मुंबई : कोकणातील महाराष्ट्र नवनिर्माण सेनेचे नेते वैभव खेडेकर यांचा भाजपामध्ये प्रवेश पुन्हा वेटिंगवर ठेवण्यात आला आहे. काही दिवसांपूर्वी मनसेतून बडतर्फ झालेल्या खेडेकर यांनी भाजपामध्ये प्रवेश घेण्याचे संकेत दिले होते, परंतु राजकीय परिस्थिती आणि स्थानिक अडथळ्यांमुळं हा कार्यक्रम स्थगित झाला आहे. रत्नागिरीतून आलेल्या समर्थकांचा ताफा आणि त्यांच्या व्हॉट्सअप स्टेटसमुळं ही घटना सध्या राजकीय चर्चेचा विषय ठरली आहे.

पक्ष प्रवेशात पुन्हा गोंधळ :

मनसेतून बडतर्फ झाल्यानंतर खेडेकर यांचा भाजप प्रवेश निश्चित झाला होता, परंतु काही राजकीय अडथळ्यांमुळे हा कार्यक्रम पुन्हा स्थगित करण्यात आला. भाजपा नेत्यांशी झालेल्या चर्चेनंतर पक्ष प्रवेश ठरवण्यात आला होता, पण अद्याप अंतिम निर्णय झाला नाही.

मुंबईत आले समर्थक, पण प्रवेश अडथळ्यात : मुंबईतील नरीमन पॉईंट इथं त्यांचा पक्ष प्रवेश ठरला होता. रत्नागिरीतून आलेल्या 40-50 गाड्यांच्या ताफ्यासह खेडेकर समर्थकांसह मुंबईत दाखल झाले, तरीही प्रवेश अद्याप होत नाही. यामुळे कार्यकर्त्यांमध्ये नाराजी दिसून आली आहे.

व्हॉट्सअप स्टेटसवर जोरदार चर्चा :

वैभव खेडेकर यांचे व्हॉट्सअप स्टेटस चर्चेत आहेत. “मेरा पानी उतरता देख मेरे किनारे घर मत बसा लेना, मैं समुंदर हूँ लौटकर जरूर आउंगा” अशा शब्दांत त्यांनी समर्थकांना इशारा दिला आहे, ज्यामुळे सोशल मीडियावर चर्चा रंगली आहे.

भाजपामध्ये जवळकी, मनसेत रोष वाढला :

भाजपा नेत्यांशी खेडेकर यांची वाढलेली जवळकी मनसेतून रोष निर्माण करत आहे. शिवसेना शिंदे गटात जाण्याची चर्चा असताना त्यांनी भाजपला प्राधान्य दिले. पक्ष प्रवेश चार सप्टेंबरला ठरला होता, परंतु आरक्षण आणि स्थानिक राजकीय परिस्थितीमुळं तो ढकलला गेला.

वैभव खेडेकर: कोकणातील विश्वासू नेते

वैभव खेडेकर हे राज ठाकरे यांचे कोकणातील शिलेदार आणि युवा वर्गात लोकप्रिय नेते आहेत. त्यांनी २०१४ मध्ये दापोली विधानसभा निवडणूक लढवली, खेड नगरपरिषदेचा अनुभव आणि समर्थकांमध्ये लोकप्रियता यामुळे ते मनसेत महत्त्वाचे स्थान राखत होते. आता त्यांचा भाजप प्रवेश आणि राजकीय भविष्य ही मुख्य चर्चा ठरली आहे. एकंदरीतच, वैभव खेडेकरांचा भाजपा प्रवेश अजूनही पूर्ण झालेला नाही. समर्थक आणि राजकीय वर्तुळात यावर चर्चा सुरु आहे. आता पाहावं लागेल की भाजपा या प्रवेशाबाबत पुढं काय निर्णय घेतील आणि खेडेकर यांचं राजकीय भविष्य कसं घडतं.