-गजानन पवार | हिंगोली प्रतिनिधी
Hingoli Farmer Suicide : हिंगोली जिल्ह्यात दुष्काळ आणि पिकांच्या नुकसानीमुळे शेतकरी कुटुंबांसमोरील संकट पुन्हा एकदा अधोरेखित झाले आहे. औंढा नागनाथ तालुक्यातील गोजेगाव येथे बैलपोळ्याच्या दिवशी एका 60 वर्षीय महिला शेतकऱ्याचा मृत्यू झाला. त्यांनी विषारी औषध प्राशन केल्यानंतर उपचारादरम्यान त्यांचा मृत्यू झाल्याची माहिती आहे.
कमलबाई सोपान कांदे (वय 60) असे मृत महिलेचे नाव आहे. कमलबाई यांच्याकडे दोन एकर शेती होती. त्या अल्पभूधारक शेतकरी होत्या.
दोन एकर शेतीवर कुटुंबाचा उदरनिर्वाह ( Hingoli Farmer Suicide )
कमलबाई कांदे यांच्याकडे दोन एकर शेती होती. मागील काही वर्षांपासून त्यांच्या शेतीला कधी अतिवृष्टी, तर कधी पावसाअभावी निर्माण झालेल्या परिस्थितीचा सामना करावा लागत होता. यंदा जून महिन्यात त्यांनी दोन एकर क्षेत्रात कापूस आणि सोयाबीनची लागवड केली होती. सुरुवातीच्या काळात पिकांची स्थिती चांगली असल्याचे सांगण्यात येते.
मागील महिनाभरापासून पावसाने ओढ दिल्याने शेतातील उभी पिके वाळून गेली. हाताशी आलेले पीक डोळ्यांसमोर खराब होत असल्याने कमलबाई काही दिवसांपासून चिंतेत असल्याचे कुटुंबीयांनी सांगितले. पिकांचे नुकसान, शेतीवरील आर्थिक ताण आणि भविष्यातील चिंतेमुळे शेतकरी कुटुंबांसमोरील मानसिक व आर्थिक संकटाचा प्रश्न पुन्हा चर्चेत आला आहे.
हेही वाचा : 80s Photo Trend: AI फोटो बनवताना सावधान! ‘या’ चुका टाळा, नाही तर होऊ शकतो…
बैलपोळ्याच्या दिवशी घडली दुर्दैवी घटना
बैलपोळ्यानिमित्त कमलबाई यांनी आपल्या बैलांची पूजा केली. त्यानंतर त्यांनी विषारी औषध प्राशन केल्याची माहिती समोर आली. घटनेनंतर त्यांना उपचारासाठी रुग्णालयात दाखल करण्यात आले. मात्र उपचार सुरू असताना त्यांचा मृत्यू झाला.
बैलपोळ्यासारख्या पारंपरिक सणाच्या दिवशीच ही घटना घडल्याने कांदे कुटुंबावर दुःखाचा डोंगर कोसळला आहे. दरम्यान, या घटनेनंतर दुष्काळ, पिकांचे नुकसान, आर्थिक अडचणी आणि शेतकरी कुटुंबांवरील मानसिक ताण या प्रश्नांकडे गांभीर्याने पाहण्याची गरज पुन्हा अधोरेखित झाली आहे.
