मुंबई : महाराष्ट्र राज्य मार्ग परिवहन महामंडळाने (MSRTC) प्रवाशांसाठी एक नवीन डिजिटल सुविधा सादर केली आहे. ‘आपली एसटी’ (Aapli ST) नावाचे हे ॲप प्रवाशांना त्यांच्या जवळच्या बस स्थानकाची अचूक माहिती आणि रिअल-टाईम अपडेट्स देईल. दसऱ्याच्या मुहूर्तावर परिवहन मंत्री प्रताप सरनाईक यांनी या ॲपच्या लाँचची घोषणा केली. सध्या राज्यभरातील १२,००० हून अधिक बसेस आणि १ लाखांहून अधिक मार्गांचे मॅपिंग या ॲपमध्ये समाविष्ट केले गेले आहे, ज्यामुळे प्रवाशांना प्रवास अधिक सोपा आणि सुरक्षित होईल.

लाईव्ह ट्रॅकिंग आणि सुविधा :

‘आपली एसटी’ ॲपच्या माध्यमातून प्रवाशांना बस कुठे आहे, कोणत्या वेळेस येणार आहे, याची थेट माहिती मिळेल. प्रवाशांना बस स्थानकावर जास्त वेळ थांबावे लागणार नाही आणि ते थेट बसमध्ये प्रवास सुरू करू शकतील. ॲपमध्ये अँड्रॉइड आणि ॲपल दोन्ही युजर्ससाठी सुविधा उपलब्ध आहेत. यात प्रवाशांना जवळच्या बस स्थानकाचा शोध घेणे, दोन थांब्यांदरम्यानच्या बस वेळापत्रकाची माहिती पाहणे, आरक्षित तिकीटातील बस क्रमांक किंवा सेवा क्रमांक टाकून लाईव्ह ट्रॅकिंग करणे यांचा समावेश आहे. तसेच, आपत्कालीन परिस्थितीसाठी महत्त्वाचे हेल्पलाइन नंबरही दिले आहेत, ज्यामुळे एका क्लिकवर मदत मिळवता येईल.

सुरुवातीच्या टप्प्यातील माहिती आणि सुधारणा :

सध्या ॲपवर १२,००० हून अधिक बसेसचा लाईव्ह डेटा उपलब्ध आहे. भविष्यात राज्यातील सर्व बसेसचे लोकेशन या ॲपमध्ये शोधता येईल. प्रवाशांच्या अभिप्रायावर आधारित ॲपमध्ये सुधारणा करण्याचे काम सुरु आहे. लवकरच MSRTC च्या विद्यमान तिकीट बुकिंग ॲपमध्येही लाईव्ह बस डेटा समाविष्ट केला जाणार आहे, ज्यामुळे आगाऊ तिकीट आरक्षण करणाऱ्या प्रवाशांना देखील सुविधा मिळेल.

परिवहन मंत्री प्रताप सरनाईक म्हणाले, “एसटीचा उद्देश प्रवाशांना अधिक विश्वासार्ह, पारदर्शक आणि सुरक्षित सेवा देणे आहे. ‘आपली एसटी’ ॲप याच दिशेने महत्त्वाचे पाऊल आहे. प्रवाशांकडून सूचना व अभिप्राय मिळवून सतत सुधारणा करणे आमची प्राथमिकता आहे.”

मराठमोळे नाव आणि सोप्या वापरासाठी मार्गदर्शन :

सध्या हे ॲप MSRTC commuter app या नावाने प्ले स्टोअरवर उपलब्ध आहे. लवकरच ‘आपली एसटी’ नावानेही डाऊनलोड करता येईल. या ॲपमुळे प्रवाशांना बसची अचूक माहिती, तिकीट आणि आपत्कालीन मदत एका ठिकाणी मिळेल. सरनाईक यांनी प्रवाशांना सुरुवातीच्या टप्प्यातील तांत्रिक अडचणी असल्यास त्या नोंदवण्याचे आवाहन केले आहे.

‘आपली एसटी’ ॲप प्रवाशांच्या दैनंदिन प्रवासासाठी एक महत्त्वाचे साधन ठरेल. हे ॲप वापरून प्रवासी अधिक सुरक्षित, वेळेवर आणि पारदर्शक प्रवासाचा अनुभव घेऊ शकतील.