Repo Rate : रिझर्व्ह बँक ऑफ इंडिया (RBI) नं यावेळी रेपो दरात कोणताही बदल केलेला नाही. RBI गव्हर्नर संजय मल्होत्रा ​​यांनी शुक्रवारी जाहीर केलं की रेपो दर 5.25 टक्के राहील. या निर्णयामुळं कर्जाचं व्याजदर अपरिवर्तित राहतील, ज्यामुळं ग्राहकांना कोणताही दिलासा मिळणार नाही. RBI च्या चलनविषयक धोरण समितीनं आपली तटस्थ भूमिका कायम ठेवली आहे, म्हणजेच भविष्यात गरज पडल्यास RBI व्याजदर कमी करण्यास किंवा वाढविण्यास तयार आहे. संजय मल्होत्रा ​​यांनी सांगितलं की अमेरिकेसोबतच्या व्यापार करारामुळं भारताच्या निर्यातीला लक्षणीय चालना मिळेल.

भारताची अर्थव्यवस्था आणि वाढ सध्या मजबूत :

रेपो दराव्यतिरिक्त, RBI नं SDF (स्थायी ठेव सुविधा) आणि MSF (मार्जिनल स्टँडिंग सुविधा) देखील अपरिवर्तित ठेवली आहे. SDF 5 टक्के आणि MSF 5.50 टक्के ठेवण्यात आला आहे. RBI गव्हर्नरांनी सांगितलं की भारत थेट परकीय गुंतवणुकीसाठी (FDI) एक पसंतीचं ठिकाण आहे. देशाच्या अर्थव्यवस्थेबद्दल संजय मल्होत्रा ​​म्हणाले की भारताची अर्थव्यवस्था आणि वाढ सध्या मजबूत स्थितीत आहे. देशाचा वास्तविक जीडीपी वाढ 7.4 टक्क्यांपर्यंत पोहोचण्याच्या मार्गावर असल्याचं आरबीआयनं म्हटलं आहे.

महागाई नियंत्रणात :

संजय मल्होत्रा ​​म्हणाले की देशातील महागाई नियंत्रणात आहे. आर्थिक वर्ष 2026 मध्ये देशाचा किरकोळ महागाई दर 2 टक्क्यांवरून 2.1 टक्क्यांपर्यंत वाढला आहे. आरबीआयनं चालू आर्थिक वर्षाच्या चौथ्या तिमाहीसाठी महागाईचा अंदाज 2.9 टक्क्यांवरून 3.2 टक्के केला आहे. आरबीआय गव्हर्नरनं आर्थिक वर्ष 2027 च्या पहिल्या तिमाहीसाठी महागाईचा अंदाज 3.9 टक्क्यांवरुन 4 टक्के केला आहे. दुसऱ्या तिमाहीसाठी महागाईचा अंदाज 4 टक्क्यांवरून 4.2 टक्के करण्यात आला आहे.