Professor Stabbed in Local Train Dispute : मुंबईतील पश्चिम रेल्वेमार्गावरील मालाड स्थानकावर एक धक्कादायक घटना घडली आहे. लोकलमधून उतरताना झालेल्या किरकोळ वादातून एका व्यक्तीने प्राध्यापकाची चाकू भोसकून हत्या केली आहे. त्यामुळे मालाड स्थानकावर एकच खळबळ उडाली आहे. आलोक सिंह (वय ३१) असे मृत प्राध्यापकाचे नाव आहे. याप्रकरणी पोलिसांनी आरोपी ओंकार शिंदे (वय 27) याला अटक करण्यात आली आहे.

हेही वाचा – भाजप नगरसेविकांच्या कार्यकर्त्यांमध्ये फ्लेक्स लावण्यावरुन हाणामारी, दोन्ही गटांवर गुन्हे

मिळालेल्या प्राथमिक माहितीनुसार, ट्रेनमधून उतरताना धक्का लागल्याच्या कारणावरुन आलोक सिंह आणि ओंकार शिंदे यांच्यात वाद झाला होता. या वादात ओंकारचा संताप हाताबाहेर गेल्याने त्याने आलोक सिंह यांच्या पोटात चाकू खुपसला. त्यानंतर ओंकार शिंदे हा फरार झाला. या घटनेनंतर रेल्वे पोलिसांनी घटनास्थळी येऊन पंचनामा केला. दरम्यान, हत्या झाल्यानंतर आरोपी ओंकार शिंदे याचा स्टेशनवरुन पळतानाचा व्हिडिओ समोर आला आहे.

ओंकार शिंदे याला वसई स्थानकावरून अटक

रेल्वे पोलिसांनी स्टेशनमधील सीसीटीव्ही फुटेजच्या आधारे तपास सुरू केला. त्यानंतर आता ओंकार शिंदे याला वसई स्थानकावरून अटक केली आहे. सध्या आरोपीला बोरीवली पोलीस ठाण्यात आणण्यात आलं असून त्याची कसून चौकशी सुरु करण्यात येत आहे. दोघांचा वाद का झाला? याचं नेमकं कारण कळू शकलं नव्हतं. फक्त धक्का लागल्याचा राग आल्याने ओंकार शिंदे याने इतकं टोकाचं पाऊल उचलले का? याचा तपास पोलिसांकडून केला जात आहे. या चौकशीतून आता काय समोर येणार? याकडे सर्वांचं लक्ष लागले आहे.

प्राध्यापक आलोक सिंह गणिताचे प्राध्यापक

प्राध्यापक आलोक सिंह हे गणिताचे प्राध्यापक होते. ते विलेपार्लेतल्या नरसी मोंजी कॉलेज ऑफ कॉमर्समध्ये विद्यार्थ्यांना शिकवत होते. आलोक सिंग खूप शांत, दयाळू आणि सभ्य होते. आलोक सिंग कधीच कुणाच्या युक्तिवाद किंवा भांडणात पडत नसत, असं त्यांच्या सहकाऱ्यांनी सांगितलं. आलोक सिंग खूप साधे आणि कधीच रागवत नसे, असं त्यांच्या नातेवाईकांनी सांगितलं. विलेपार्ले स्टेशनवरुन ते बोरीवलीला जाणाऱ्या लोकलमध्ये बसले. २०२४ पासून ते नरसी मोंजी काॅलेजमध्ये कार्यरत होते. आलोक सिंग यांचे काका देखली प्राध्यापक आहेत.