Student Brutally Beaten : एका विवाहितेला घरातून उचलून नेल्याची आणि मुलीवर सामुहिक बलात्काराची घटना ताजी असतानाच बीडच्या गेवराईतून एक धक्कादायक घटना समोर आलीय. गुन्हेगारीमुळे नावारूपाले आलेले बीड (Beed Crime News) पुन्हा एकदा विद्यार्थ्याला केलेल्या अमानुष मारहाणीमुळे (Student Brutally Beaten) चर्चेच्या केंद्रस्थानी आले आहे. बीडच्या गेवराईमध्ये एका विद्यार्थ्याला वसतिगृह चालकाने बेदम मारहाण केल्याची धक्कादायक घटना समोर आली. थकीत एक हजार रुपयांच्या शुल्कासाठी प्रवीण जाधव या विद्यार्थ्याला ( Student Pravin Jadhav) ही अमानुष मारहाण करण्यात आली. या मारहाणीच्या घटनेची पोलिसांनी गंभीर दखल घेत वसतिगृह चालकावर गेवराई पोलीस ठाण्यात गुन्हा दाखल केला आहे.

मिळालेल्या प्राथमिक माहितीनुसार, गेवराई तालुक्यातील मारफळा तांडा येथील ऊसतोड मजूर बाळू जाधव यांचा मुलगा प्रवीण गेवराईतील सूर्योदय निवासी वस्तीगृहात राहून शिक्षण घेत आहे. बाळू जाधव यांनी चालू वर्ष वसतिगृहाच्या ४० हजार शुल्कापैकी ३९ हजार रुपये शुल्क भरले. मात्र, उर्वरित राहिलेल्या केवळ एक हजार रुपये शुल्कामुळे वसतीगृह चालक सुरेश राठोड तगादा लावत होता.

पालक वसतिगृह शुल्क वेळेवर भरत नसल्याने वसतिगृह चालक सुरेश राठोड याने विद्यार्थ्याला शिवीगाळ करत बेदम मारहाण केली. या प्रकारानंतर संतप्त पालकांच्या तक्रारीवरून सुरेश राठोड विरोधात गेवराई पोलिस ठाण्यात गुन्हा दाखल करण्यात आला. एका विद्यार्थ्याला झालेल्या मारहाणीच्या घटनेमुळे पालकांकडून संताप व्यक्त केला जात आहे. या घटनेमुळे बीड जिल्ह्यातील गुन्हेगारी पार्श्वभूमी कधी संपणार? आणि गुन्हेगारांमध्ये पोलिसांचा धार राहिला नाही का? असे प्रश्न पुन्हा एकदा या घटनेमुळे समोर आले आहेत.