कटिहार Horrific Road Accident : बिहारमधील कटिहार इथं एक भीषण अपघात घडला असून, त्यात 10 जणांचा मृत्यू झाला आहे. बस आणि पिकअप ट्रकची धडक झाल्यानं हा अपघात झाला. या घटनेत 30 हून अधिक लोक जखमीही झाले आहेत.

हेही वाचा : केदारनाथ यात्रेसाठी हेलिकॉप्टर बुकिंग सुरु; कसं करायचं तिकिट बुक? वाचा

पोलिसांनी दिली माहिती :

कटिहार पोलिसांनीही या घटनेबाबत एक निवेदन जारी केलं आहे. कटिहार पोलिसांनी म्हटलं आहे, “आज, 11 एप्रिल 2026 रोजी, कटिहार जिल्ह्यातील कोइरा पोलीस ठाण्याच्या हद्दीतील गेराबारीजवळ बस आणि पिकअप ट्रक यांच्यात एक भीषण अपघात घडला. आतापर्यंत दहा जणांचा मृत्यू झाला आहे. अपघातात जखमी झालेल्या अंदाजे 25 जणांना प्रथमोपचार दिल्यानंतर पुढील वैद्यकीय उपचारांसाठी जवळच्या रुग्णालयात दाखल करण्यात येत आहे.”

संपूर्ण प्रकरण काय :

कटिहारच्या कोइरा पोलीस ठाण्याच्या हद्दीतील एनएच-31 वर झालेल्या भीषण अपघातात आतापर्यंत दहा जणांचा मृत्यू झाला असून, 30 हून अधिक जण जखमी झाल्याचं वृत्त आहे. मृतांमध्ये महिला आणि एका निष्पाप मुलीचा समावेश आहे. जत्रेतून परतणाऱ्या प्रवाशांना घेऊन जाणाऱ्या पिकअप ट्रकची भरधाव वेगानं येणाऱ्या बसशी समोरासमोर धडक झाल्यानं हा अपघात घडला. यामुळं संपूर्ण परिसर हादरला.

जखमींना रुग्णालयात दाखल :

मिळालेल्या माहितीनुसार, भरधाव वेगानं येणाऱ्या बसची प्रवाशांनी भरलेल्या पिकअप ट्रकशी समोरासमोर धडक झाली. या धडकेचा परिणाम इतका भीषण होता की, 10 जणांचा जागीच मृत्यू झाला, तर 30 हून अधिक जण जखमी झाले. जखमींपैकी सुमारे 20 जणांची प्रकृती गंभीर असून, त्यांना पुढील उपचारांसाठी पूर्णिया सदर रुग्णालयात दाखल करण्यात आलं आहे. मृतांमध्ये महिला आणि एका निष्पाप मुलाचा समावेश आहे, ज्यामुळं या अपघाताची भीषणता आणखी वाढली आहे.

माहिती मिळताच पोलीस घटनास्थळी दाखल :

पिकअप ट्रकमधील सर्व लोक पूर्णिया जिल्ह्यातील धामदाहा येथील रहिवासी होते आणि जत्रेला भेट देऊन घरी परतत असताना हा भीषण अपघात घडला. अपघातानंतर संपूर्ण परिसरात घबराट आणि गोंधळाचं वातावरण पसरलं. या घटनेची माहिती मिळताच पोलीस तात्काळ घटनास्थळी दाखल झाले आणि त्यांनी बचाव व मदतकार्य सुरु केलं.