नवी दिल्ली: बिहारच्या राजकारणातून बाहेर पडल्यानंतर नितीन नबीन यांचं राजकीय स्थान राष्ट्रीय पातळीवर बळकट झालं आहे. भाजपानं त्यांना एक महत्त्वाची जबाबदारी दिली आहे. त्यांना पक्षाचे नवे राष्ट्रीय कार्यकारी अध्यक्ष म्हणून नियुक्त करण्यात आलं आहे, जे केवळ बिहारमध्येच नव्हे तर पक्षाच्या संघटनेतही त्यांचा वाढता प्रभाव असल्याचे स्पष्ट संकेत आहे. बंकीपूरचे पाच वेळा आमदार राहिलेले नितीन नबीन यांचा राजकीय प्रवास अनुभव, संघटनात्मक ताकद आणि विश्वासाची कहाणी सांगतो.

पंतप्रधान मोदींनी केलं नितीन नबीन यांचं कौतुक :

भाजपाच्या राष्ट्रीय कार्यकारी अध्यक्षपदी नियुक्ती झाल्यानंतर नितीन नबीन म्हणाले, “मी केंद्रीय नेतृत्व, पंतप्रधान मोदी, गृहमंत्री अमित शहा, संरक्षण मंत्री राजनाथ सिंह आणि केंद्रीय नेतृत्वातील प्रत्येकाचे मला ही संधी दिल्याबद्दल आभार मानतो.” त्यांचे अभिनंदन करताना पंतप्रधान मोदींनी पोस्ट केलं, “नीतीन नबीन यांनी स्वतःला एक समर्पित कार्यकर्ता म्हणून स्थापित केलं आहे. ते व्यापक संघटनात्मक अनुभव असलेले एक तरुण आणि कष्टाळू नेते आहेत आणि बिहारमध्ये आमदार आणि मंत्री म्हणून त्यांचा प्रभावी कार्यकाळ होता. त्यांनी लोकांच्या अपेक्षा पूर्ण करण्यासाठी खूप मेहनत घेतली आहे. ते त्यांच्या नम्र स्वभावासाठी आणि व्यावहारिक कार्यशैलीसाठी ओळखले जातात. येणाऱ्या काळात त्यांची ऊर्जा आणि समर्पण आमच्या पक्षाला बळकटी देईल असा मला विश्वास आहे. भाजपाचे राष्ट्रीय कार्यकारी अध्यक्ष झाल्याबद्दल त्यांचे हार्दिक अभिनंदन.”

श्री नितिन नबीन जी ने एक कर्मठ कार्यकर्ता के रूप में अपनी विशिष्ट पहचान बनाई है। वे एक युवा और परिश्रमी नेता हैं, जिनके पास संगठन का अच्छा-खासा अनुभव है। बिहार में विधायक और मंत्री के रूप में उनका कार्य बहुत प्रभावी रहा है, साथ ही जनआकांक्षाओं को पूरा करने के लिए उन्होंने पूरे…

— Narendra Modi (@narendramodi) December 14, 2025

कोण आहेत नितीन नबीन? :

नितीन नबीन हे बिहारमधील एक अनुभवी भाजपा नेते आहेत. ते पाटण्यातील बांकीपूर विधानसभा मतदारसंघातून दीर्घकाळ आमदार आहेत. बिहारच्या राजकारणात त्यांच्या सक्रिय भूमिकेसाठी लोक त्यांना ओळखतात. त्यांच्या राजकीय प्रवासाबद्दल बोलायचं झालं तर, नितीन नबीन यांना संघटनात्मक आणि विधानसभा दोन्ही पातळीवर मजबूत पकड असल्याचं मानलं जातं. त्यांनी बिहार सरकारमध्ये शहरी विकास, रस्ते आणि इमारत बांधकाम यासारख्या महत्त्वाच्या खात्यांची जबाबदारी सांभाळली आहे. प्रशासकीय कामात त्यांची तत्परता आणि काटेकोरपणा हे त्यांचं वैशिष्ट्य आहे. नितीन नबीन हे तळागाळातील नेते म्हणून ओळखले जातात जे त्यांच्या मतदारसंघात खूप सक्रिय आहेत. ते प्रशासकीय अनुभव आणि संघटनात्मक ताकद दोन्ही दाखवतात.

सम्राट चौधरींनी केलं नितीन नबीन यांचं अभिनंदन :

बिहारचे उपमुख्यमंत्री सम्राट चौधरी म्हणाले, “बिहारमधून नितीन नबीन यांची निवड केल्याबद्दल मी पंतप्रधान मोदी आणि संघटना नेते जेपी नड्डा यांचे आभार मानतो. नितीन नबीन यांना भाजपाचे कार्यकारी अध्यक्ष म्हणून नामांकन देण्यात आलं आहे. यासाठी नितीन नवीन यांचे खूप खूप अभिनंदन.”

बिहार भाजपा प्रमुखांनी म्हटलं ऐतिहासिक :

बिहारचे मंत्री नितीन नबीन यांची भाजपाच्या राष्ट्रीय कार्यकारी अध्यक्षपदी नियुक्ती झाल्याबद्दल, बिहारमधील पक्षाचे अध्यक्ष आणि बिहार सरकारमधील मंत्री दिलीप जयस्वाल म्हणाले, “आज भाजपासाठी एक ऐतिहासिक दिवस आहे, बिहारमधील एका नेत्याला पक्षाचे राष्ट्रीय कार्यकारी अध्यक्ष म्हणून नियुक्त करण्यात आले आहे. मी नितीन नबीन यांचं अभिनंदन करतो.”