Pune Nanded Flight : पुणे आणि नांदेड दरम्यान प्रवास करणाऱ्या प्रवाशांना काहीसा दिलासा मिळाला आहे. नांदेड विमानतळावरील मुख्य धावपट्टीवरील देखभाल आणि दुरुस्तीच्या कामामुळं गेल्या दोन महिन्यांपासून बंद असलेली विमान सेवा आता अधिकृतपणे पुन्हा सुरू झाली आहे. धावपट्टीवर आढळलेले खड्डे आणि तांत्रिक दोष दूर केल्यानंतर विमानांचं कामकाज सुरु झालं.

DGCA कडून मंजुरी :

नागरी विमान वाहतूक महासंचालनालय (DGCA) कडून सुरक्षा मंजुरी मिळाल्यानंतर विमानांचं कामकाज सुरु झालं. प्रवाशांची सुरक्षितता आणि विमानांचं सुरक्षित लँडिंग सुनिश्चित करण्यासाठी प्रशासनानं तात्पुरतं कामकाज थांबवलं होतं. सर्व तांत्रिक तपासणी पूर्ण झाल्यानंतर सेवा पूर्ववत करण्यात आल्या आहेत.

या शहरांमधील उड्डाणांवरही परिणाम :

रनवे दुरुस्तीमुळं स्टार एअरच्या पुणे-नांदेड सेवेवर तसंच दिल्ली, हैदराबाद, बेंगळुरु आणि अहमदाबादला जाणाऱ्या विमानांवर परिणाम झाला होता. सर्व वेळापत्रकातील उड्डाणं आता सामान्य झाली आहेत.

आजूबाजूच्या जिल्ह्यांना थेट फायदा (Pune Nanded Flight) :

सेवा पुन्हा सुरु झाल्यामुळं केवळ नांदेडमधीलच नव्हे तर लातूर, परभणी, हिंगोली, यवतमाळ आणि निजामाबादसारख्या आसपासच्या जिल्ह्यांतील प्रवाशांनाही थेट फायदा होईल. यामुळं व्यावसायिक क्रियाकलापांना चालना मिळेल आणि धार्मिक पर्यटनाला चालना मिळेल. ही हवाई सेवा अत्यंत महत्त्वाची मानली जाते, विशेषतः तख्त श्री हजूर साहिबला भेट देणाऱ्या यात्रेकरूंसाठी. विमानसेवा पुन्हा सुरू केल्यानं प्रवाशांचा वेळ वाचेल आणि प्रादेशिक संपर्क मजबूत होईल.