Mulund Metro : मुंबईतील मुलुंड परिसरात शनिवारी निर्माणाधीन मेट्रो रेल लाईन-4 गर्डर ब्रिजचा स्लॅब कोसळल्याप्रकरणी पाच जणांना अटक करण्यात आली आहे. एलबीएस रोडवरील जॉन्सन अँड जॉन्सन कारखान्याजवळ हा अपघात झाला, ज्यामध्ये एकाचा मृत्यू झाला आणि तीन जण जखमी झाले. मुलुंड पोलिसांनी आयपीसीच्या कलम 105, 110, 324(5) आणि 3(5) अंतर्गत गुन्हा दाखल केला आहे. या प्रकरणात कंपनीचे व्यवस्थापक, अभियंता, पर्यवेक्षक आणि कामगार यांना आरोपी करण्यात आलं आहे.

पाच आरोपींना अटक :

मुलुंड अपघातात अटक केलेल्या पाच आरोपींना अटक केली आहे. यात,

• हरीश चौहान, प्रकल्प संचालक
• कुलदीप सपकाळ, प्रकल्प व्यवस्थापक
• सौरभ सिंग, उपव्यवस्थापक
• प्रशांत भोईर, पर्यवेक्षक
• अवधूत इनामदार, प्रकल्प व्यवस्थापक

ऑटो रिक्षा आणि कारवर पडला स्लॅब :

पोलीस आणि पालिका अधिकाऱ्यांच्या मते, एलबीएस रोडवर बांधकाम सुरु असलेल्या मेट्रो रेल लाईन-4 च्या गर्डर पुलाच्या पॅरापेट भिंतीचा स्लॅब दुपारी एका ऑटो रिक्षा आणि कारवर पडला, ज्यामुळं दोन्ही वाहनांचं मोठं नुकसान झाले. या अपघातात एकाचा मृत्यू झाला आणि इतर तीन जण जखमी झाले. हे लक्षात घ्यावं की लाईन-4 दक्षिण-मध्य मुंबईतील वडाळा ते शेजारच्या ठाणे या भागाला जोडत आहे, ज्याचा मोठा भाग प्रमुख एलबीएस मार्गावरून जातो, जो विक्रोळी, भांडुप, मुलुंड आणि इतर भागांना जोडतो.

मुख्यमंत्री फडणवीसांनी दिले चौकशीचे आदेश :

मुख्यमंत्री देवेंद्र फडणवीस म्हणाले की, या घटनेची सखोल चौकशी केली जाईल. अशा प्रकारच्या घटना टाळण्यासाठी अशा सर्व ठिकाणी तातडीनं सुरक्षा तपासणी सुरु केली जाईल असं त्यांनी सांगितले. फडणवीस म्हणाले, “मुलुंडमधील अपघात अत्यंत दुर्दैवी आहे. मृतांच्या कुटुंबियांसह आणि जखमींसोबत आमच्या प्रार्थना आहेत. जखमींचा वैद्यकीय खर्च एमएमआरडीए आणि राज्य सरकार उचलेल. योग्य सुरक्षा उपाययोजना केल्या गेल्या आहेत की नाही याची चौकशी केली जाईल. जबाबदार असलेल्यांवर कारवाई केली जाईल.”