Dhananjay Munde meets Amit Shah : खोट्या कागदपत्रांच्या आधारे मुख्यमंत्री कोट्यातील काही सदनिका लाटल्याच्या आरोपाखाली क्रीडा मंत्री माणिकराव कोकाटे यांना दोषी ठरवण्यात आलं आहे. तसेच नाशिक सत्र न्यायालयाने कनिष्ठ न्यायालयाने दिलेला निकाल कायम ठेवलं आहे. या निकालानंतर आता नाशिक पोलिसांनी कोकाटे यांच्याविरोधात अटकेचा वारंट जारी केलं आहे. त्यामुळे राज्याच्या राजकारणात वेगवान घडामोडी घडत असल्याचे समोर आले आहे. तर तिकडे माजी मंत्री धनंजय मुंडे यानी दिल्लीत जाऊन भाजपच्या पक्षश्रेष्ठींची भेट घेतल्याचं समोर आलं आहे. त्यामुळे माणिकराव कोकाटे यांचे मंत्रीपद जाणार असून धनंजय मुंडे हे सरकारमध्ये सहभागी होण्यार असल्याचे अंदाज वर्तवण्यात येत आहेत.
मंत्री कोकाटे यांच्या नावे अटक वारंट जारी होताच ते नाॅट रिचेबल असल्याच्या बातम्या समोर आल्या होत्या. मात्र, काही तासानंतर ते लिलावती रुग्णालयात दाखल झाले असून त्यांच्यावर उपचार सुरू असल्याचे सांगण्यात आले. न्यायालयाने कोकाटे यांची शिक्षा कायम ठेवल्याने त्यांचे मंत्रीपद आणि आमदारकी धोक्यात आली आहे. त्यानंतर कोकाटे यांनी सत्र न्यायालयाच्या निर्णयाला स्थगिती द्यावी, यासाठी मुंबई उच्च न्यायालयाता धाव घेतली आहे. या प्रकरणी शुक्रवारी उच्च न्यायालयात सुनावणी पार पडणार आहे या सर्व घडामोडी घडत असताना आता माजी मंत्री धनंजय मुंडे हे अॅक्शन मोडमध्ये आले आहेत. एकीकडे यांचे मंत्रीपद धोक्यात आलेले असतानाच मुंडे दिल्लीच्या दौर्यावर आहेत.
आज नवी दिल्ली येथे केंद्रीय गृह तथा सहकार मंत्री आदरणीय श्री. अमित भाई शहा यांची भेट घेऊन परळी वैद्यनाथ स्थित प्रभू वैद्यनाथ ज्योतिर्लिंग तीर्थ स्थळाचा केंद्र सरकारच्या प्रसाद योजनेत समावेश करण्याबाबत विनंती केली. या योजनेच्या माध्यमातून ज्योतिर्लिंग स्थळाचा विकास व कायाकल्प… pic.twitter.com/xr5IqIskwo
— Dhananjay Munde (@dhananjay_munde) December 17, 2025
तेव्हाही कोकाटे यांच्या राजीनाम्याची मागणी
मिळालेल्या माहितीनुसार अजित पवार यांच्या पक्षाचे नेते तथा माजी मंत्री धनंजय मुंडे सध्या दिल्लीच्या दौऱ्यावर आहेत. आपल्या या दौऱ्यामध्ये त्यांनी एनडीएच्या वरिष्ठ नेत्यांची भेट घेतली आहे. या भेटीत नेमकी काय चर्चा झाली आहे? हे अद्याप समोर येऊ शकलेले नाही. कोकाटे यांचे मंत्रिपद धोक्यात आलेले असतानाच धनंजय मुंडे हे दिल्ली दौऱ्यावर गेलेले असल्याने वेगवेगळ्या चर्चांना उधाण आले आहे. माणिकराव कोकाटे हे विधिमंडळातील सभागृहात ऑनलाईन रमी खेळताना दिसून आले होते. तेव्हाही कोकाटे यांच्या राजीनाम्याची मागणी करण्यात आली होती. त्यावेळीदेखील धनंजय मुंडे सक्रीय झाल्याचे पाहायला मिळाले होते. त्यांनी मुख्यमंत्री देवेंद्र फडणवीस यांची भेट घेतली होती. आता धनंजय मुंडे थेट दिल्लीला गेले आहेत.
उच्च न्यायालयात शुक्रवारी १९ डिसेंबर रोजी सुनावणी
दुसरीकडे माणिकरा कोकाटे यांच्यावर अटकेची टांगती तलवार आहे. त्यांचे मंत्रिपद कोणत्याही क्षणी जाऊ शकते असे सांगितले जात आहे. कोकाटे यांनी उच्च न्यायालयात केलेल्या अर्जावर आता शुक्रवारी दि. १९ डिसेंबर रोजी सुनावणी पार पडणार आहे. महायुतीमध्ये आता कोकाटे यांचे मंत्रिपद गेले तर त्याची जागा कोणाला द्यावी, यावरही आता चर्चा सुरू झाल्याचे सांगितले जात आहे. त्यामुळे आता भविष्यात काय होणार? हे पाहणे महत्त्वाचे ठरणार आहे.
