Operation Tiger Fail Thackeray Meeting :  महाराष्ट्राच्या राजकीय वर्तुळात सध्या उपमुख्यमंत्री एकनाथ शिंदे (Eknath Shinde) यांच्या कथित ‘ऑपरेशन टायगर’ची जोरदार चर्चा रंगली आहे. शिवसेना ठाकरे गटातील काही खासदार शिंदे गटाकडे वळतील, अशा अफवा जोरात पसरल्या आहेत. या पार्श्वभूमीवर शिवसेना (ठाकरे गट) पक्षप्रमुख आणि माजी मुख्यमंत्री उद्धव ठाकरे (Uddhav Thackeray) यांनी रविवारी मुंबईतील मातोश्री निवासस्थानी पक्षातील सर्व खासदारांची विशेष बैठक (MP Meeting) बोलावली होती. ही बैठक पक्षातील एकजूट आणि सध्याच्या राजकीय अफवांना प्रत्युत्तर देण्यासाठी महत्त्वाची मानली जात आहे.

बैठकीला काही खासदार प्रत्यक्ष उपस्थित नव्हते. मात्र सर्व खासदार व्हिडिओ कॉन्फरन्सिंगद्वारे सक्रियपणे सहभागी झाले होते. बैठक संपल्यानंतर शिवसेना ठाकरे गटाचे खासदार संजय राऊत यांनी माध्यमांशी सविस्तर संवाद साधला आणि बैठकीतील उपस्थिती व गैरहजेरीची कारणे स्पष्ट केली. बैठकीला उपस्थित खासदारसंजय राऊत यांनी सांगितले की, पक्षप्रमुख उद्धव ठाकरे यांनी आज सर्व खासदारांची बैठक घेतली. या बैठकीला मुंबईत खासदार अरविंद सावंत, संजय दिना पाटील, अनिल देसाई आणि राजाभाऊ वाझे हे चार खासदार प्रत्यक्ष उपस्थित होते. उर्वरित पाच खासदारांनी ऑनलाइन पद्धतीने बैठक सुरू ठेवली.

गैरहजर खासदार आणि त्यांची कारणे

ओमराजे निंबाळकर (धाराशिव) – त्यांचा मुलगा पुण्यातील दीनानाथ मंगेशकर रुग्णालयात दाखल असल्याने ते रुग्णालयातूनच व्हिडिओ कॉन्फरन्सिंगद्वारे बैठकीला हजर होते. मुलाच्या तब्येतीची काळजी घेत असतानाही त्यांनी बैठकीत सहभाग घेतला.

भाऊसाहेब वाकचौरे (शिर्डी)      – त्यांच्या पत्नी आजारी असल्याने ते शिर्डी येथील रुग्णालयातूनच ऑनलाइन माध्यमातून बैठकीत सहभागी झाले.

नागेश आष्टीकर (हिंगोली)         – त्यांचा मुलगा विधानपरिषदेच्या निवडणुकीच्या रिंगणात उभा असल्याने आष्टीकर यांनीही ऑनलाइन पद्धतीने हजेरी लावली.

संजय देशमुख (वाशिम)           – मुलीच्या लग्नाची तयारी सुरू असल्याने ते मुंबईत येऊ शकले नाहीत. त्यांनीही घरूनच व्हिडिओ कॉन्फरन्सिंगद्वारे बैठक सुरू ठेवली.

गैरहजर खासदार येत्या दोन-तीन दिवसांत स्वतः मातोश्रीवर येतील

संजय राऊत यांनी स्पष्ट शब्दांत सांगितले की, “आमच्या पक्षाचे सर्व खासदार बैठकीला उपस्थित होते. कोणीही फुटणार नाही. पक्षप्रमुख उद्धव ठाकरे यांच्या नेतृत्वाखाली आम्ही पूर्णपणे एकजूट आहोत.” ‘ऑपरेशन टायगर’बाबत माध्यमांनी विचारले असता संजय राऊत यांनी ही चर्चा फक्त अफवांवर आधारित असल्याचे सांगितले. ते म्हणाले, “लोकसभा निवडणुकीपासून ही चर्चा वारंवार सुरू होते, पण त्यात कोणतेही तथ्य नाही. आमचे सर्व खासदार पक्षप्रमुख उद्धव ठाकरे यांच्या सोबत ठाम आहेत. पक्षप्रमुख दर महिन्याला अशा प्रकारच्या बैठका घेत असतात. पुढील महिन्यातही अशीच बैठक होणार आहे. जे खासदार आज प्रत्यक्ष येऊ शकले नाहीत, ते येत्या दोन-तीन दिवसांत स्वतः मातोश्रीवर येऊन पक्षप्रमुखांची भेट घेतील.

कैलास पाटील यांच्याकडून खंडन

दुसरीकडे, ठाकरे गटाचे आमदार कैलास पाटील यांनीही माध्यमांना प्रतिक्रिया देताना ‘ऑपरेशन टायगर’च्या चर्चेला पूर्णपणे फुगा पाडला. ते म्हणाले, “धाराशिवचे खासदार ओमराजे निंबाळकर यांच्या मुलाची तब्येत बरी नसल्याने ते रुग्णालयाच्या कामात व्यस्त होते. त्यांनी पक्षप्रमुखांना याची पूर्वकल्पना दिली होती. २०२२ मध्ये एकसंध शिवसेनेत फूट पडल्यानंतर उद्धव ठाकरे यांना साथ देण्याची भूमिका आम्ही घेतली होती आणि यापुढेही हीच भूमिका कायम राहील.”ठाकरे गटाकडून सातत्याने एकजुटीचे आणि बंडखोरीला थारा न देण्याचे संदेश दिले जात आहेत. सध्याच्या अफवा केवळ राजकीय मनोरंजनासाठी पसरवल्या जात असल्याचे पक्ष नेत्यांचे मत आहे. या बैठकीमुळे ठाकरे गटातील खासदारांमध्ये पूर्ण एकजूट असल्याचे स्पष्ट संकेत मिळाले आहेत. आगामी विधानपरिषद निवडणुकी आणि इतर राजकीय घडामोडींच्या पार्श्वभूमीवर ही बैठक महत्त्वाची ठरली आहे.