Afghanistan Air Force Strike On Islamabad | सध्या अफगाणिस्तान (Afghanistan) आणि पाकिस्तानमधील (Pakistan) युद्ध चांगलंच पेटलं आहे. पाकिस्तानने केलेल्या एअर स्ट्राईकचा (Air Strike) बदला म्हणून अफगाणिस्तानने थेट पाकिस्तानची राजधानी इस्लामाबादवर (Islamabad) हवाई हल्ले करत प्रत्युत्तर दिलं आहे. अफगाणिस्तानच्या हवाई दलानं सकाळी 11 च्या सुमारास हा हल्ला केल्याची माहिती समोर आली आहे.

हेही वाचा – एअर स्ट्राईकचा हिशोब चुकता! अफगाणिस्तानचा पाकिस्तानवर जोरदार पलटवार, पाकची 15 लष्करी ठिकाणे ताब्यात

अफगाणिस्तानचा इस्लामाबादवर हल्ला

या हल्ल्याबाबत अफगाणिस्तानच्या संरक्षण मंत्रालयानं माहिती दिली. त्यांनी दिलेल्या माहितीनुसार, अफगाण सैन्याचे लक्ष्य पाकिस्तानचे तळ होते. तसंच अफगाण विमानांनी इस्लामाबादमधील फैजाबाद शहाराजवळील एका मिलिटरी कॅम्पवर बॉम्बफेक केली. त्यानंतर त्यांनी अबोटाबाद आणि नौशेरा येथील लष्करी तळांना लक्ष्य केलं.

काल पाकिस्तानने काबूल आणि कंदहारमध्ये हवाई हल्ला केला होता, त्याचाच हा बदला असल्याचं अफगाणिस्तानने म्हटलं आहे. जमरूद मिलिटरी कॉलनीवरही अफगाणिस्तानने हल्ले केले आहेत. हे हवाई हल्ले ड्रोनद्वारे केल्याचे सांगितले जात आहे.

अफगाणिस्तानने केलेल्या हल्ल्यामुळे पाकिस्तानला बसला मोठा फटका

दरम्यान, हवाई हल्ल्यांसोबतच अफगाणिस्तानने जमिनीवरील युद्धातही मोठ्या प्रमाणात हल्ले केले आहेत. यामध्ये पाकिस्तानला मोठा फटका बसला असून ड्युरंड लाईनवर झालेल्या चकमकीत 55 पाकिस्तानी सैनिकांचा मृत्यू झाला आहे. तर पाकिस्तानच्या दोन लष्करी मुख्यालयांसह 19 चौक्यांवर तालिबानने कब्जा मिळवला आहे.