Digvijay Singh Post : मध्य प्रदेशचे माजी मुख्यमंत्री आणि काँग्रेस नेते दिग्विजय सिंह यांनी काँग्रेस कार्यकारिणी (CWC) बैठकीत संघटनात्मक केंद्रीकरणाचा मुद्दा उपस्थित केला. सूत्रांनी दिलेल्या माहितीनुसार, सिंग म्हणाले की विकेंद्रीकरण किंवा संघटनात्मक सुधारणा आवश्यक आहेत. त्यांनी म्हटलं की राज्यांमध्ये अध्यक्षांची नियुक्ती केली जाते, परंतु समित्या स्थापन केल्या जात नाहीत. सिंग यांचं हे विधान राहुल गांधींच्या कार्यशैलीवर प्रश्नचिन्ह म्हणून पाहिलं जात आहे.

भाजपाचं कौतुक, राजकारण तापलं :

काँग्रेसचे ज्येष्ठ नेते दिग्विजय सिंह यांनी काँग्रेस कार्यकारिणीची बैठक सुरु होण्यापूर्वी सोशल मीडियावर एक पोस्ट पोस्ट केली ज्यामुळं राजकीय वर्तुळात खळबळ उडाली आहे. त्यांनी पंतप्रधान नरेंद्र मोदींचा एक जुना फोटो शेअर केला आहे, ज्यामध्ये मोदी लालकृष्ण अडवाणींच्या पायाजवळ बसलेले दिसत आहेत. दिग्विजय सिंह यांनी फोटोसोबत लिहिलं आहे की, “एक राष्ट्रीय स्वयंसेवक संघाचा स्वयंसेवक आणि भाजपाचा एक तळागाळातील कार्यकर्ता सुरुवातीपासून मुख्यमंत्री आणि पंतप्रधान बनला. ही संघटनेची ताकद आहे. जय सिया राम.” काँग्रेस नेतृत्वाला ही अप्रत्यक्ष सूचना आहे का? या पोस्टमुळं एक महत्त्वाचा प्रश्न उपस्थित झाला आहे. (Digvijay Singh Post)

दिग्विजय सिंह (Digvijay Singh Post) काय म्हणाले :

काँग्रेसचे ज्येष्ठ नेते दिग्विजय सिंह यांनी त्यांच्या एक्स हँडलवर एक पोस्ट पोस्ट केली. राहुल गांधींना थेट टॅग करत त्यांनी लिहिलं की, “तुम्ही सामाजिक आणि आर्थिक मुद्द्यांवर उत्कृष्ट काम करत आहात. यासाठी तुम्हाला पूर्ण गुण मिळायला हवेत, परंतु आता काँग्रेस पक्षाकडे थोडं लक्ष द्या, कारण त्याला निवडणूक आयोगासारख्या सुधारणांची आवश्यकता आहे. तुम्ही संघटनात्मक विकासाची सुरुवात केली आहे, परंतु हे फक्त पुरेसं नाही.” दिग्विजय सिंह म्हणाले की काँग्रेसला विकेंद्रित कामकाजाची आवश्यकता आहे. मला माहित आहे की तुम्ही ते कराल… कारण तुम्ही हे करु शकता. एकमेव समस्या तुम्हाला पटवून देण्याची आहे. तुम्हाला पटवून देणं सोपं नाही. पोस्टच्या शेवटी, दिग्विजय सिंह यांनी लिहिलं जय सिया राम.

मल्लिकार्जुन खरगे काय म्हणाले :

दरम्यान, काँग्रेस अध्यक्ष मल्लिकार्जुन खरगे यांनी काँग्रेस कार्यकारिणी (CWC) च्या बैठकीत बोलताना बांगलादेशातील हिंदू अल्पसंख्याकांवर होणाऱ्या हल्ल्यांचा निषेध केला आणि संपूर्ण भारत चिंतेत असल्याचं सांगितलं. खरगे यांनी काँग्रेस नेत्यांना आगामी विधानसभा निवडणुकीसाठी सज्ज होण्याचं आवाहन केलं आणि असंही म्हटलं की विशेष सघन सुधारणा (SIR) हे लोकशाही अधिकार मर्यादित करण्याचं जाणूनबुजून केलेलं षड्यंत्र आहे आणि काँग्रेस मतदारांची नावं वगळली जाणार नाहीत याची खात्री केली पाहिजे. खरगे म्हणाले की संसदेच्या अलिकडच्या हिवाळी अधिवेशनात मनरेगा रद्द करुन मोदी सरकारनं लाखो गरीब आणि असुरक्षित लोकांना निराधार केलं आहे. मोदी सरकारनं गरिबांच्या पाठीत खंजीर खुपसला आहे तर पोटात लाथ मारली आहे. मनरेगा बंद करणं हा राष्ट्रपिता महात्मा गांधींचा अपमान आहे.