Narendra Modi death threat : भारताचे पंतप्रधान नरेंद्र मोदी बुधवारी आंध्र प्रदेश आणि तामिळनाडूला भेट देणार आहेत. मात्र, तामिळनाडूतील सत्ताधारी द्रमुकच्या एका नेत्यानं पंतप्रधान मोदींना जीवे मारण्याची धमकी दिली आहे. द्रमुक नेत्यानं पंतप्रधान मोदींना जीवे मारण्याची धमकी दिल्याचा व्हिडिओ पाहून खळबळ उडाली आहे. भाजपाचे तामिळनाडू प्रदेशाध्यक्ष नयनर नागेंद्रन यांनी हा व्हिडिओ सोशल मीडियावर शेअर केला आहे आणि लिहिलं आहे की पंतप्रधानांना जीवे मारण्याची धमकी देणाऱ्या द्रमुक नेत्याला ताबडतोब अटक करावी.

द्रमुक नेत्यानं काय म्हटलं? :

तेनकासी जिल्ह्यात एसआयआरच्या विरोधात झालेल्या निषेधात द्रमुक दक्षिण जिल्हा सचिव जयपालन यांनी पंतप्रधान मोदींची अप्रत्यक्षपणे हत्या करण्याची धमकी दिली. द्रमुक नेत्यानं पंतप्रधान मोदींची तुलना नरकासुराशी केली. ते म्हणाले, “मोदी तुमची मतं चोरण्यासाठी हताश आहेत. ते आणखी एक राक्षस आहेत. त्यांना संपवूनच तामिळनाडूला फायदा होऊ शकतो. आपण ही लढाई एकजुटीनं लढली पाहिजे आणि जिंकली पाहिजे.”

भाजपा संतापला :

तामिळनाडू भाजप अध्यक्ष नयनर नागेंद्रन यांनी सोशल मीडियावर लिहिलं की, “देशात अत्यंत महत्त्वाच्या पदावर असलेल्या नेत्याला, विशेषतः जगभरात आदर असलेल्या एका महान नेत्याला, कोणताही आदर किंवा स्टेज शिष्टाचार नसताना, जिवे मारण्याची धमकी देणे, तामिळनाडूतील कायदा आणि सुव्यवस्थेच्या परिस्थितीबद्दल शंका निर्माण करते. विशेषतः, जिल्हा सचिवांचे क्रूर भाषण न थांबवता तेथे उपस्थित असलेल्या तेनकासीच्या खासदार राणी श्रीकुमार आणि शंकरनकोविल आमदार राजा यांचे मौन संपूर्ण पक्षाच्या हिंसक स्वरूपाचा आणि क्रूरतेचा पर्दाफाश करते. हे टाळण्यासाठी द्रमुक कोणतेही सबब वापरत असले तरी ते स्वीकारले जाणार नाहीत. मी द्रमुक सरकारला द्रमुक दक्षिण जिल्हा सचिव जयपालन यांना तात्काळ अटक करण्याची विनंती करतो, ज्यांनी भारताच्या माननीय पंतप्रधानांच्या सुरक्षिततेला धोका निर्माण करणारी विधानं केली.”

பிரதமருக்குக் கொலை மிரட்டல் விடுத்த திமுக நிர்வாகியைக் கைது செய்ய வேண்டும்!

தென்காசியில் திமுக சார்பாக நடைபெற்ற நிகழ்ச்சியில், மாண்புமிகு பாரதப் பிரதமர் திரு. @narendramodi அவர்களுக்குத் திமுக தெற்கு மாவட்டச் செயலாளர் ஜெயபாலன் கொலை மிரட்டல் விடுத்துள்ளது கடும்… pic.twitter.com/4NY99QVYEF

— Nainar Nagenthran (@NainarBJP) November 18, 2025

पंतप्रधान मोदींचं वेळापत्रक :

भारताचे पंतप्रधान नरेंद्र मोदी बुधवारी आंध्र प्रदेशातील पुट्टपार्थी येथील सत्य साई बाबा यांच्या पवित्र मंदिराला भेट देतील. त्यानंतर, पंतप्रधान मोदी तामिळनाडूतील कोइम्बतूरला जातील. ते दक्षिण भारत नैसर्गिक शेती शिखर परिषदेचं उद्घाटन करतील आणि पीएम-किसान योजनेअंतर्गत शेतकऱ्यांना 21वा हप्ता प्रदान करतील.