Gaurav Khanna: टीव्ही अभिनेता आणि ‘बिग बॉस’मधून लोकप्रिय झालेल्या गौरव खन्ना नेहमी आपल्या कामामुळे चर्चेत असतो. मात्र यंदा तो आणि त्याची पत्नी आकांक्षा हिने घटस्फोट घेणार असल्याची घोषणा केल्यानंतर गौरवने ‘Lockup 2’ या शोमध्ये यावर आपली प्रतिक्रिया दिली.

अभिनेता गौरव खन्ना (Gaurav Khanna) आणि अभिनेत्री आकांक्षा चामोला यांच्या वैवाहिक नात्याबाबत गेल्या काही काळापासून विविध चर्चा सुरू आहेत. आकांक्षाने सार्वजनिकरित्या घटस्फोटाचा निर्णय जाहीर केल्यानंतर या विषयाने अधिकच लक्ष वेधून घेतले. दरम्यान, ‘Lockup 2’ या रिअॅलिटी शोमध्ये गौरवची उपस्थिती आणि त्याने व्यक्त केलेली भूमिका सोशल मीडियावर चर्चेचा विषय ठरली आहे.

हेही वाचा: नैसर्गिक आपत्ती की प्रशासनाची चूक? मोशी दुर्घटनेनंतर जबाबदारीवर प्रश्नचिन्ह; नातेवाईकांचा व्यवस्थेला सवाल

शोदरम्यान गौरवने आकांक्षाशी संवाद साधला (Gaurav Khanna)

शोदरम्यान गौरवने आकांक्षाशी संवाद साधताना सांगितले की, घटस्फोटाबाबत त्यांनी यापूर्वी फक्त परस्पर चर्चा केली होती. मात्र, अद्याप कोणतीही कायदेशीर प्रक्रिया पूर्ण झालेली नसल्याने त्यांचा घटस्फोट अंतिम झालेला नाही, असे त्याने स्पष्ट केले.

घटस्फोट घेण्याचा निर्णय कधी घेतला?

आकांक्षाने त्याला सांगितले की हा निर्णय त्याच्या ‘खतरों के खिलाडी’मधील सहभागाच्या काळात घेण्यात आला होता. यावर गौरवने प्रतिक्रिया देताना म्हटले की, शो सुरू होण्याच्या अवघ्या काही दिवस आधी हा विषय समोर आल्यामुळे त्याच्यावर मानसिक ताण निर्माण झाला होता. अशा परिस्थितीत स्पर्धेवर लक्ष केंद्रित करणे आणि वैयक्तिक आयुष्यातील गुंतागुंत हाताळणे दोन्ही एकाच वेळी कठीण झाले होते, असे त्याने नमूद केले.

यानंतर गौरवने सांगितले की त्या घटनेला आता बराच काळ लोटला असून दोघेही आयुष्यात पुढे जाण्याचा प्रयत्न करत आहेत. या संवादासाठी शोची सूत्रसंचालक फराह खान यांनी दोघांना खासगीपणे बोलण्यासाठी स्वतंत्र जागा उपलब्ध करून दिली.

अफवांबद्दल चिंता व्यक्त

त्या खासगी चर्चेदरम्यान गौरवने माध्यमांमध्ये आणि सोशल मीडियावर सुरू असलेल्या अफवांबद्दल चिंता व्यक्त केली. लोक अपूर्ण माहितीच्या आधारावर वेगवेगळे निष्कर्ष काढत आहेत आणि त्यांच्या नात्याबद्दल चुकीच्या गोष्टी पसरवत आहेत, असे त्याने म्हटले.

गौरव म्हणाला की (Gaurav Khanna)

गौरवने पुढे स्पष्ट केले की, “कायदेशीरदृष्ट्या आपण अजूनही पती-पत्नी आहोत. त्यामुळे आपल्या वैयक्तिक आयुष्याबद्दल कोणत्याही प्रकारचे चुकीचे किंवा अपमानास्पद वक्तव्य मला मान्य नाही. तुझ्याविषयी कोणीही चुकीचे बोलावे, हे मी स्वीकारू शकत नाही.”

‘Lockup 2’मधील हा संवाद समोर आल्यानंतर अनेक प्रेक्षकांनी गौरवने शांतपणे आणि संयमाने आपली भूमिका मांडल्याचे सांगत त्याच्या वागण्याचे कौतुक केले.