सध्या सर्वत्र नवरात्रौत्सवाची धामधूम सुरु असून आनंद, उत्साहासोबतच अनेक अनुचित प्रकार देखील समोर येत आहेत. विरारच्या विवा कॉलेजमध्ये नवरात्रीनिमित्त सुरू असलेल्या गरब्यात येणाऱ्या मुलींविषयी दोन (मुस्लीम) तरुणांचे सोशल मीडिया चॅटमुळे खळबळ उडाली आहे. या चॅटमध्ये अनेक अश्लील आणि वादग्रस्त वाक्यांसोबतच “एकही हिंदू मुलगी सोडू नका” असं बोलल्याचा उल्लेख पाहायला मिळत आहे. या आक्षेपार्ह चॅट प्रकरणी बोळींज पोलीस ठाण्यात गुन्हा दाखल करण्यात आला असून पोलिसांनी आक्षेपार्ह चॅट करणाऱ्या अल्पवयीन आरोपीला ताब्यात घेतले आहे.
काय लिहिलं आहे त्या व्हॉट्सअ‍ॅप चॅटमध्ये?
समोर आलेल्या व्हॉट्सअ‍ॅप चॅटमध्ये दोन तरुणांचं संभाषणअसून यामध्ये ते मुलींसोबत शरीरसंबंध ठेवण्याबाबत बोलत आहे. जी हिंदू मुलगी दिसेल तिच्याशी जवळीक कर, असा सल्ला या व्हॉट्सअ‍ॅप चॅटमध्ये देण्यात आला आहे. याशिवाय, रात्रीच्या वेळी मुलींना कॉलेजमधील कुठला मजला निर्मनुष्य असेल, असा संतापजनक वाक्याचाही चॅटमध्ये उल्लेख आहे. या चॅटमध्ये अत्यंत अश्लील आणि आक्षेपार्ह शब्दांचा वापर करण्यात आला आहे.
दरम्यान, भाजप युवा मोर्चा प्रदेश सचिव अशोक शेळके यांनी हा लव्ह जिहादचा कट असल्याचा गंभीर आरोप करून गरबा हा केवळ हिंदूसाठीच, अशी भूमिका त्यांनी घेतली आहे. तर माजी आमदार हिंतेद्र ठाकूर यांनी भाजपाच्या आरोपांवर प्रतिहल्ला केला असून गरबा सर्वांसाठी असल्याचे म्हटले आहे. विरारच्या विवा महाविद्यालयात गुजराथी मित्रमंडळ आणि U238 या संस्थेच्या संयुक्त विद्यमाने गरब्याचे आयोजन करण्यात आले आहे. या गरब्यात येणाऱ्या मुलींसंदर्भात दोन तरूणांचे आक्षेपार्ह चॅट व्हायरल झाले आहे. हे चॅट व्हायरल झाल्याने खळबळ उडाली असून या संभाषणात गरब्यात असलेल्या मुलींवर कशा प्रकारे अत्याचार करता येईल, असं त्या तरुणाने सांगितले आहे. यावर गरब्याआडून लव्ह जिहाद सुरू असल्याचा आरोप भाजप युवा मोर्चा प्रदेश सचिव अशोक शेळके यांनी केला आहे.
तर, “ज्यांनी हे आरोप केले आहेत त्यांच्या एवढे मूर्ख जगात कुठेही बघायला मिळणार नाही” असे म्हणत माजी आमदार हितेंद्र ठाकूर यांनी भाजपने केलेल्या आरोपांची खिल्ली उडवली. तसेच, या गरब्याचा महाविद्यालयाशी काही संबंध नाही. खासगी संस्थेचा हा गरबा असून तो केवळ महाविद्यालयाच्या प्रांगणात आयोजित केला जातो. त्यात सुरक्षेच्या सर्व नियमांचे पालन होते. गरबा हा सर्वधर्मियांसाठी खुला असून कुणावरही बंदी घालणे चुकीचे असल्याचे त्यांनी म्हटले आहे. या प्रकरणी विवा कॉलेज प्रशासनाने तात्काळ भूमिका घेत, बोईसर पोलीस ठाण्यात तक्रार दाखल केली आहे. पोलिसांनी या प्रकरणी अश्लील आणि वादग्रस्त चॅट करणाऱ्या दोन आरोपींपैकी एका अल्पवयीन आरोपीला ताब्यात घेतले आहे, तर दुसऱ्याचा शोध सुरु आहे.
कॉलेज प्रशासनाने या घटनेला गांभीर्याने घेत पोलीस ठाण्यात तक्रार दाखल केली आहे. गरब्यातील चॅट वादामुळे वातावरण तापले असले तरी कॉलेज प्रशासन आणि हितेंद्र ठाकूर यांनी भाजपाच्या आरोपांना जोरदार प्रतिवाद करत, या प्रकरणाला राजकीय रंग दिला जात असल्याचा आरोप ठाकूर यांना आहे. त्यामुळे या प्रकरणी आता कोणते नवीन खुलासे होतात ते पाहणे महत्त्वाचे ठरणार आहे.
