POCSO Case for Harassment of Minor : वाशिम शहरात अल्पवयीन मुलींच्या सुरक्षेचा प्रश्न पुन्हा एकदा ऐरणीवर आला आहे. एका १६ वर्षीय अल्पवयीन मुलीचा सतत पाठलाग, तिचा मानसिक छळ, तिच्यावर जबरी लग्नासाठी दबाव, कुटुंबीयांना ठार मारण्याची धमकी, आणि मध्यरात्री घरात घुसून दहशत निर्माण केल्याचा धक्कादायक प्रकार समोर आला आहे. या प्रकरणी वाशिम शहर पोलिसांनी दोन मुलांचा बाप असणाऱ्या शेख शाहरूख शेख गफुर या 35 वर्षीय आरोपी वर पोक्सोसह विविध कलमान्वये गुन्हा दाखल करून त्याला अटक केली असून पुढील तपास वाशिम शहर पोलीस करीत आहेत.
हेही वाचा – लोकलमधून उतरण्याच्या किरकोळ वादातून प्राध्यापकाची चाकू भोसकून हत्या
२३ जानेवारीच्या मध्यरात्री आरोपी थेट पीडितेच्या घरी पोहोचला गेट वाजवलं आणि दरवाजा उघडताच बळजबरीने घरात घुसला. घरच्यांनी विरोध केला असता आरोपीने हुज्जत घालून मी तुझ्या मुलीशी लग्न करणार लग्न लावून दिलं नाही तर गंभीर परिणाम भोगावे लागतील अशी धमकी दिली. एवढंच नाही तर गेटवर फाशी घेण्याची धमकी देत तो पळून गेला काही वेळ आरोपीने दहशत माजवली होती.
मुलीच्या आईने दिलेल्या तक्रारीनुसार, आरोपी गेल्या ११ महिन्यांपासून पीडित मुलीचा सतत पाठलाग करत होता. मुलगी दुकानात एकटी असताना सलगी करण्याचा प्रयत्न, क्लासला जाताना पाठलाग, तसेच वारंवार लग्नाचा तगादा लावत दबाव टाकल्याचा आरोप आहे. काही महिन्यांपूर्वी आरोपीने मुलीला बोलण्यासाठी मोबाईल दिल्याची माहिती असून त्यावरून सतत कॉल्स आणि मेसेज करून त्रास दिला जात होता.
या घटनेनंतर पीडितेच्या आईने शहर पोलीस ठाण्यात धाव घेत तक्रार दिली. त्यानुसार आरोपीवर BNS कलम ३३३, ७८(२), ३५१(२), ३५१(३) आणि पोक्सो कलम १२ अंतर्गत गुन्हा दाखल करण्यात आला आरोपीला अटक केली आहे पुढील तपास वाशिम शहर पोलीस करीत असल्याचे पोलीस निरीक्षक चौधरी यांनी सांगितले.
