Army Vehicle Accident : गुरुवारी, जम्मू आणि काश्मीरमधील दोडा इथं सैन्याचं एक वाहन रस्त्यावरुन घसरुन खोल दरीत पडलं. यात दहा सैनिकांचा मृत्यू झाला आणि अनेक जण जखमी झाले. स्थानिक आणि बचाव पथकांनी जखमींना वाचवण्यासाठी काम केलं.

200 फूट दरीत पडलं वाहन :

अपघाताची माहिती देताना, सैन्याच्या अधिकाऱ्यांनी सांगितलं की, 17 सैनिकांना घेऊन जाणारं एक सैन्याचं वाहन उंच चौकीकडे जात असताना दोडा येथील भादरवाह-चंबा आंतरराज्य रस्त्यावरील खानी टॉपजवळ बुलेटप्रूफ वाहन रस्त्यावरुन घसरुन 200 फूट खोल दरीत पडलं. या अपघातात 10 सैनिकांचा मृत्यू झाला, तर काही गंभीर जखमी झाले.

जखमींना केलं रुग्णालयात दाखल :

अपघाताची माहिती मिळताच, संयुक्त सैन्य आणि पोलिसांच्या पथकानं तात्काळ बचाव कार्य सुरु केलं. स्थानिकांनीही पोलीस आणि बचाव पथकांना मदत करण्यासाठी धाव घेतली. 10 सैनिकांचे मृतदेह बाहेर काढण्यात आले. जखमी सैनिकांना बाहेर काढण्यात आलं असून त्यापैकी अनेकांची प्रकृती गंभीर असल्याचं वृत्त आहे. तिघांनाही हेलिकॉप्टरने उधमपूर येथील कमांड रुग्णालयात हलवण्यात आलं, जिथं त्यांच्यावर विशेष उपचार सुरु आहेत.

मृत सैनिकांच्या कुटुंबियांना दिली माहिती :

सैन्यानं एक निवेदन जारी करुन सांगितलं की, अपघाताची चौकशी सुरु करण्यात आली आहे आणि जखमी सैनिकांना सर्वोत्तम उपचार दिले जात आहेत. अपघातात मृत्युमुखी पडलेल्या सैनिकांच्या कुटुंबियांना माहिती देण्यात आली आहे.

उपराज्यपालांकडून दुःख व्यक्त :

जम्मू आणि काश्मीरचे उपराज्यपाल मनोज सिन्हा यांनी अपघाताबद्दल दुःख व्यक्त केलं आणि 10 सैनिकांच्या मृत्युची माहिती दिली. त्यांनी ट्विटरवर लिहिलं की, “दोडा इथं झालेल्या दुर्दैवी अपघातात आपल्या 10 शूर भारतीय सैन्याच्या जवानांच्या मृत्युमुळं खूप दुःख झालं आहे. आपल्या शूर सैनिकांच्या उत्कृष्ट सेवेचं आणि सर्वोच्च बलिदानाचं आपण नेहमीच स्मरण करु. शोकग्रस्त कुटुंबांप्रती माझ्या मनापासून संवेदना. या अत्यंत दुःखद घटनेत, संपूर्ण राष्ट्र शोकग्रस्त कुटुंबांसोबत एकता आणि पाठिंब्यात उभं आहे. 10 जखमी सैनिकांना विमानानं रुग्णालयात नेण्यात आलं आहे. मी वरिष्ठ अधिकाऱ्यांना सर्वोत्तम उपचार सुनिश्चित करण्याचे निर्देश दिले आहेत. मी त्यांच्या जलद पुनर्प्राप्तीसाठी प्रार्थना करतो.”