मुंबई : रेल्वेनं आरक्षण चार्ट तयार करण्यासाठी एक नवीन नियम लागू केला आहे, ज्यामुळं प्रवाशांना मोठा दिलासा मिळाला आहे. रेल्वे बोर्डानं सर्व झोनल रेल्वेंना एक आदेश जारी केला आहे ज्यामध्ये म्हटलं आहे की आता रेल्वे आरक्षण चार्ट आगाऊ तयार केले जातील, जेणेकरून वेळेवर सीट उपलब्ध होतील आणि प्रवासाचे नियोजन सोपं होईल.

रेल्वे प्रवाशांसाठी चार्ट टायमिंग अत्यंत महत्त्वाचं आहे, कारण ते सीट उपलब्धता आणि तिकिट पुष्टीकरणाची माहिती देते. पूर्वी, चार्ट अनेकदा प्रवासाच्या वेळेच्या जवळ तयार केले जात होते, ज्यामुळं सीट उपलब्ध होण्यास उशीर होत असे. लांब पल्ल्याच्या प्रवाशांना आणि रात्रीच्या गाड्यांमध्ये प्रवास करणाऱ्यांना तिकिटाची स्थिती तपासण्यात अनेकदा मोठी अडचण येत असे. तथापि, रेल्वेनं आता ही समस्या सोडवली आहे. रेल्वे बोर्डाच्या नवीन आदेशानुसार, हे नियम आरक्षण चार्टवर लागू होतील.

काय आहे नवी वेळ :

नव्या आदेशानुसार पहाटे 5:01 ते दुपारी 2:00 वाजेपर्यंत सुटणाऱ्या गाड्यांसाठीचा पहिला आरक्षण चार्ट आता आदल्या दिवशी रात्री 8 वाजेपर्यंत तयार केला जाईल. याचा अर्थ असा की जर एखाद्या प्रवाशाची ट्रेन सकाळी 6, 10 किंवा 1 वाजता निघाली तर त्यांना त्यांच्या सीटची स्थिती आदल्या रात्री कळेल. तसंच दुपारी 2:01 ते रात्री 11:59 दरम्यान सुटणाऱ्या सर्व गाड्यांसाठी, रेल्वे किमान 10 तास आधी आरक्षण चार्ट तयार करेल. जर एखादी गाडी रात्री 12 ते पहाटे 5 दरम्यान सुटली तर रेल्वे त्यांचा चार्ट किमान 10 तास आधी तयार करेल. रेल्वेनं म्हटलं आहे की या नवीन नियमांमुळं लांब पल्ल्याचा प्रवास करणाऱ्या आणि इतर शहरांमधून येणाऱ्या प्रवाशांना विशेषतः फायदा होईल. आगाऊ सीटची माहिती मिळाल्याने ते वेळेत त्यांच्या प्रवासाची तयारी करू शकतील.

हे ही वाचा : तपोवनातील वृक्षतोडीवर मुंबई न्यायालयाने घेतला महत्वपूर्ण निर्णय; सरकारला दिले निर्देश

या नियमामुळं प्रवाशांना होईल फायदा :

रेल्वे अधिकाऱ्यांच्या मते, लवकर चार्ट तयार करण्याचा फायदा असा होईल की वेटिंग तिकिट असलेल्या प्रवाशांना त्यांची कन्फर्मेशन स्थिती आधीच कळेल. कन्फर्म तिकिटं मिळण्याच्या आशेनं प्रवासी अनेकदा शेवटच्या क्षणापर्यंत वाट पाहत असत, परंतु आता ही समस्या कमी होईल. शिवाय, रेल्वेने स्पष्ट केलं आहे की हा निर्णय देशभरातील सर्व गाड्यांना लागू होईल. हा आदेश सर्व झोनल रेल्वे, विभागीय रेल्वे व्यवस्थापक आणि संबंधित अधिकाऱ्यांना पाठवण्यात आला आहे. रेल्वेनं असंही म्हटलं आहे की, कोणताही गोंधळ टाळण्यासाठी प्रवासी तिकिटं प्रणाली आणि रेल्वे अॅपवर चार्ट वेळेची माहिती उपलब्ध असेल.

नवी प्रणाली सोयीस्कर :

प्रवाशांसाठी हा बदल देखील महत्त्वाचा आहे कारण चार्ट तयार केल्यानंतर अनेक तिकिटे रद्द केली जातात, जी रेल्वे नंतर प्रवाशांना तत्काळ उपलब्ध जागा म्हणून देते. पूर्वी, चार्ट तयार करण्यात विलंब झाल्यामुळे प्रवाशांना अशा जागा मिळू शकत नव्हत्या. रेल्वे बोर्डानं म्हटलं आहे की, नवीन प्रणाली प्रवाशांसाठी अधिक सोयीस्कर आणि पारदर्शक ठरेल, ज्यामुळे प्रवासात अधिक नियोजन आणि आराम मिळेल.