Nasrapur Case:

Nasrapur Case Verdict: पुणे जिल्ह्यातील नसरापूर येथे साडेतीन वर्षांच्या चिमुकलीवरील लैंगिक अत्याचार आणि हत्या प्रकरणात विशेष न्यायालयाने आरोपी भीमराव प्रभाकर कांबळे याला दोषी ठरवले आहे. या अत्यंत संवेदनशील आणि राज्यभरात संतापाची लाट निर्माण करणाऱ्या प्रकरणात आता सर्वांचे लक्ष २९ जून रोजी होणाऱ्या शिक्षेच्या निकालाकडे लागले आहे.

विशेष न्यायाधीश एस. आर. साळुंखे यांनी गुरुवारी 25 जूनला निकाल देताना आरोपीविरुद्धचे सर्व महत्त्वाचे आरोप सिद्ध झाल्याचे नमूद केले. यानंतर शिक्षेवर सुनावणी सुरू करण्यापूर्वी न्यायालयाने आरोपी भीमराव कांबळे याला बोलावून त्याची बाजू ऐकून घेतली.

यावेळी न्यायाधीशांनी घटनेच्या वेळी नेमके काय घडले होते, अशी विचारणा केली. त्यावर आरोपीने मुलगी पाय घसरून पडली होती आणि आपण तिला उचलून खाटेवर नेण्याचा प्रयत्न करत होतो, असा दावा केला. मात्र न्यायालयाने निरीक्षण नोंदवत आरोपीने यापूर्वी पोलिसांसमोर दिलेल्या जबाबातीलच गोष्टी पुन्हा सांगण्याचा प्रयत्न केल्याचे स्पष्ट केले.

हेही वाचा: आषाढी यात्रेला प्रारंभ! मुसळधार पावसातही भक्तीचा जल्लोष; मुक्ताई पालखी पंढरपूरकडे रवाना

सुनावणीदरम्यान न्यायाधीशांनी आरोपीला, “तो प्रसंग आठव आणि तूच सांग, तुला कोणती शिक्षा द्यावी?” असा सवाल केला. मात्र यानंतर आरोपीकडे कोणतेही ठोस उत्तर नव्हते. न्यायालयातील या घडामोडींनी उपस्थितांचे लक्ष वेधून घेतले.

दरम्यान, पीडित मुलीचे आई-वडीलही न्यायालयात उपस्थित होते. त्यांनी न्यायालयासमोर भावनिक भूमिका मांडत या प्रकरणातून समाजात कठोर संदेश जाणे आवश्यक असल्याचे सांगितले. अशा अमानुष कृत्यांना आळा बसण्यासाठी आरोपीला कठोरातील कठोर शिक्षा सुनावावी, अशी मागणी त्यांनी केली.

Nasrapur Case :

नसरापूर चिमुकली अत्याचार-हत्या प्रकरणात आरोपी दोषी; विशेष न्यायालयाचा नेमका काय निकाल?

या प्रकरणात विविध गंभीर कलमांखाली खटला चालवण्यात आला होता. न्यायालयाने सर्व पुरावे, साक्षीदारांचे जबाब, डीएनए अहवाल आणि तांत्रिक पुराव्यांच्या आधारे आरोपीला दोषी ठरवले आहे. काही कलमांमध्ये मृत्युदंडाची तरतूद असून, आता शिक्षेबाबतचा अंतिम निर्णय २९ जून रोजी जाहीर होणार आहे. त्यामुळे आरोपी भीमराव कांबळे याला न्यायालय कोणती शिक्षा सुनावते, याकडे संपूर्ण महाराष्ट्राचे लक्ष लागले आहे.

Nasrapur Case :

सुनावणीचा घटनाक्रम

१ मे : घटना घडली, आरोपी ताब्यात
७ मे : आरोपीची घटनास्थळी नेऊन तपासणी
१४ मे : न्यायालयीन कोठडी
१६ मे : दोषारोपपत्र दाखल
२८ मे : आरोप निश्चित
जून महिन्यात साक्षी-पुरावे नोंदवण्यास सुरुवात
१७ जून : महत्त्वाचे पुरावे सादर
२० जून : अंतिम युक्तिवाद पूर्ण
२५ जून : आरोपी दोषी
२९ जून : निकाल अपेक्षित