Lonavala Municipal Council : कार्यालयीन वेळ सकाळी ९.४५ असतानाही अनेक कर्मचारी वेळेवर हजर राहत नसल्याचे लक्षात आल्यानंतर लोणावळा नगरपरिषद अध्यक्षांनी अनोख्या पद्धतीने कर्मचाऱ्यांना संदेश देण्याचा प्रयत्न केला. उशिरा कामावर येणाऱ्या कर्मचाऱ्यांना गुलाब पुष्प देऊन त्यांचा ‘सन्मान’ करत वेळेचे महत्त्व लक्षात आणून देण्याची आगळीवेगळी शक्कल लढविण्यात आली. ही अनोखी मोहीम लोणावळा नगरपरिषद अध्यक्ष राजेंद्र सोनवणे यांच्या पुढाकाराने राबविण्यात आली.

अध्यक्ष राजेंद्र सोनावणे यांनी अचानक नगरपरिषद कार्यालयात हजेरी

माहितीनुसार, लोणावळा नगरपरिषदेतील काही कर्मचारी कार्यालयीन वेळ पाळत नसल्याच्या तक्रारी वारंवार समोर येत होत्या. सकाळी ९.४५ वाजता कार्यालय सुरू होत असतानाही अनेक कर्मचारी १० वाजल्यानंतर कार्यालयात दाखल होत असल्याचे निदर्शनास आले. याची दखल घेत अध्यक्ष राजेंद्र सोनावणे यांनी अचानक नगरपरिषद कार्यालयात हजेरी लावली.

१० वाजल्यानंतर कामावर येणाऱ्या कर्मचाऱ्यांना गुलाब पुष्प देऊन त्यांचा सन्मान

यावेळी १० वाजल्यानंतर कामावर येणाऱ्या कर्मचाऱ्यांना गुलाब पुष्प देऊन त्यांचा सन्मान करण्यात आला. मात्र हा सन्मान देताना अध्यक्षांनी कर्मचाऱ्यांना वेळेचे महत्त्व समजावून सांगत पुढील काळात कार्यालयीन वेळ काटेकोरपणे पाळण्याचे आवाहन केले. नागरिकांच्या कामांसाठी कर्मचारी वेळेवर उपस्थित राहणे अत्यंत गरजेचे असल्याचेही त्यांनी स्पष्ट केले.

नागरिकांची कामे वेळेत व्हावीत आणि प्रशासनाची कार्यक्षमता वाढावी, यासाठीच हा उपक्रम

दरम्यान, यापुढे कार्यालयीन वेळेनंतर उशिरा येणाऱ्या कर्मचाऱ्यांवर कडक कारवाई करण्यात येईल, असे निर्देशही अध्यक्ष सोनावणे यांनी दिले आहेत. नागरिकांची कामे वेळेत व्हावीत आणि प्रशासनाची कार्यक्षमता वाढावी, यासाठीच हा उपक्रम राबविण्यात आल्याचे त्यांनी सांगितले. या अनोख्या उपक्रमाची शहरात चांगलीच चर्चा रंगली असून, नगरपरिषद कर्मचाऱ्यांनीही यापुढे वेळेचे काटेकोर पालन करण्याची गरज असल्याचे मत व्यक्त होत आहे.