Adulterated milk : आंध्र प्रदेशातील (andhar pradesh) पूर्व गोदावरी (East Godavari) जिल्ह्यात भेसळयुक्त दूध (Adulterated milk) पिल्यामुळे मृत्यू झालेल्यांची संख्या वाढून १६ झाली आहे. तर तीन जणांवर राजमहेंद्रवरम( Rajamahendravaram)  येथील रुग्णालयांमध्ये उपचार सुरू आहेत. ही घटना फेब्रुवारीच्या मध्यातील आहे, जेव्हा लालचेरुवुच्या (Lalcheruvu) काही भागांमध्ये पुरवठा केलेल्या भेसळयुक्त दुधामुळे अनेक ग्राहक गंभीर आजारी पडल्याचे सांगितले जाते.

हे ही वाचा: अमेरिकेचा बंदरावर हल्ला आणि धक्का भारताला..!

तपास सुरु

यामध्ये उलट्या, पोटदुखी, लघवी न होणे आणि किडनी अचानक काम करणे बंद होणे यांसारखी लक्षणे दिसून आली, ज्यामुळे अनेकांना रुग्णालयात दाखल करावे लागले. २२ फेब्रुवारी रोजी हा प्रकार उघडकीस आला, जेव्हा चौदेश्वरनगर आणि स्वरूपनगर भागातून किडनी फेल होण्याच्या गंभीर लक्षणांसह अनेक रुग्ण आढळले. त्यानंतर आरोग्य अधिकाऱ्यांनी साथीचा तपास सुरू केला.

दूषित दूधामुळे किडनी निकामी

रविवारी प्रसिद्ध केलेल्या अधिकृत प्रसिद्धिपत्रकानुसार, प्रयोगशाळेतील तपासणीत असे आढळले की १६ मृत्यू एथिलीन ग्लायकोल नावाच्या विषारी पदार्थाने दूषित दूध पिल्यामुळे झाले. त्यामुळे त्यांच्या शरीरातील अनेक अवयव निकामी झाले.

भेसळीचा दूध पुरवठा तात्काळ बंद

प्रसिद्धिपत्रकानुसार, कोरुकोंडा मंडलातील नरसापुरम गावातील एका डेअरी युनिटमधून १०० हून अधिक कुटुंबांना दूध पुरवठा केला जात होता. या युनिटलाच भेसळीचा संशयित स्रोत मानण्यात आले असून, तेथून दूध पुरवठा तात्काळ बंद करण्यात आला. १६ फेब्रुवारी ते २१ मार्चदरम्यान एकूण २० जणांना विविध रुग्णालयांमध्ये दाखल करण्यात आले होते. त्यापैकी १६ जणांचा मृत्यू झाला, तीन जणांवर अद्याप उपचार सुरू आहेत आणि एक जण बरा होऊन घरी परतला आहे.

रॅपिड रिस्पॉन्स टीम तयार

स्थितीवर लक्ष ठेवण्यासाठी, घटनास्थळी भेट देण्यासाठी आणि लक्षणे असलेल्या रुग्णांची लवकर ओळख पटवण्यासाठी वैद्यकीय तज्ञ, महामारीतज्ज्ञ आणि निरीक्षण अधिकाऱ्यांची एक रॅपिड रिस्पॉन्स टीम तयार करण्यात आली आहे.

फॉरेन्सिक तपासासाठी पुरावे गोळा

मृत महिलेचा मुलगा ताडी सीतारामय्या यांच्या तक्रारीवरून पोलिसांनी २२ फेब्रुवारी रोजी बीएनएसएस कलम १९४ अंतर्गत गुन्हा नोंदवला. संशयित दूध विक्रेत्याला ताब्यात घेण्यात आले असून फॉरेन्सिक टीमने ठिकाणाची पाहणी करून पुरावे गोळा केले.

रुग्णसेवेचा समन्वय राखण्यासाठी वरिष्ठ आरोग्य अधिकारी आणि तज्ञ डॉक्टरांची नियुक्ती

दरम्यान, पशुसंवर्धन विभागाच्या पथकांनी बाह्य प्रदूषणाचे घटक शोधण्यासाठी टॉक्सिकोलॉजिकल तपासणीसाठी दूध, पशुखाद्य आणि पाण्याचे अतिरिक्त नमुने घेतले आहेत. उपचार पद्धतींवर लक्ष ठेवण्यासाठी आणि रुग्णालयांमध्ये रुग्णसेवेचा समन्वय राखण्यासाठी हैदराबादहून वरिष्ठ आरोग्य अधिकारी आणि तज्ञ डॉक्टरांची नियुक्ती करण्यात आली आहे.