Daveigh Chase Death: मनोरंजन विश्वाला पुन्हा मोठा धक्का बसला आहे. नुकतेच १४ जून रोजी अभिनेत्री संचिता उगलेच्या निधनाची घटना ताजी असतानाच, ‘द रिंग’ फेम अभिनेत्री डेव्ही चेस हिने काल अखेरचा श्वास घेतला.

हॉलिवूडमधून एक दू:खद बातमी समोर आली आहे. ‘ द रिंग’ आणि ‘लिलो अँड स्टिच’मधील भूमिकांमुळे जगभरात लोकप्रिय ठरलेली अभिनेत्री डेव्ही चेस (Daveigh Chase) हिचे वयाच्या ३५ व्या वर्षी निधन झाले आहे. तिच्या अकाली जाण्याने चाहत्यांसह मनोरंजन विश्वावर शोककळा पसरली आहे.

हेही वाचा: ‘ऑपरेशन टायगर’ यशस्वी? 9 पैकी 6 खासदारांनी का सोडली ठाकरेंची साथ; जाणून घ्या यामागचे कारण

मिळालेल्या माहितीनुसार, डेव्ही चेस गेल्या काही काळापासून गंभीर आरोग्य समस्यांशी झुंज देत होती. तिला मेनिन्जायटिस आणि रक्तातील संसर्गाचा त्रास होता. या संसर्गाचे पुढे सेप्सिसमध्ये रूपांतर झाल्याने तिची प्रकृती अधिकच खालावली आणि उपचारादरम्यान तिची प्राणज्योत मालवली. तिच्या निधनाची माहिती जवळच्या व्यक्तींनी दिली आहे.

बालकलाकार ते लोकप्रिय अभिनेत्री

२४ जुलै १९९० रोजी लास वेगास येथे जन्मलेल्या डेव्ही चेसने लहान वयातच अभिनय क्षेत्रात पाऊल ठेवले. तिने डिस्नेच्या लोकप्रिय अॅनिमेटेड चित्रपट Lilo & Stitch मधील ‘लिलो’ या पात्राला आवाज दिला होता. त्याचबरोबर The Ring या सुपरहिट हॉरर चित्रपटातील ‘समारा मॉर्गन’ ही भूमिका तिच्या कारकिर्दीतील सर्वाधिक गाजलेली भूमिका ठरली.

अनेक गाजलेल्या प्रकल्पांचा भाग

अभिनयासोबतच डेव्हीने व्हॉइस आर्टिस्ट म्हणूनही मोठी ओळख निर्माण केली. चित्रपट, दूरचित्रवाणी मालिका आणि अॅनिमेशन प्रकल्पांमधील तिच्या कामाचे प्रेक्षकांनी विशेष कौतुक केले होते. तिच्या निधनानंतर सोशल मीडियावर चाहते आणि सहकलाकारांकडून श्रद्धांजली वाहिली जात आहे.

वयाच्या अवघ्या 35 व्या वर्षी एका गुणी कलाकाराचा झालेला मृत्यू हा मनोरंजन क्षेत्रासाठी मोठा धक्का मानला जात आहे.