Mangesh Chivte : पुणे शिक्षक मतदारसंघाच्या निवडणुकीत मोठी राजकीय घडामोड घडली आहे. शिवसेनेचे उमेदवार मंगेश चिवटे यांनी एकनाथ शिंदे यांच्या आदेशानंतर उमेदवारी मागे घेतली. दरम्यान, मंगेश चिवटे यांना भविष्यात योग्य संधी देणार असल्याचा शब्द शिंदेंनी दिल्याची माहिती समोर आली आहे.

पुणे शिक्षक मतदारांसंघातून निवडणुकीत महायुतीमधील राजकीय समीकरणे बदलली आहेत. शिवसेना ( एकनाथ शिंदे गट ) यांच्याकडून निवडणुकीच्या रिंगणात उतरलेले मंगेश चिवटे यांनी अखेर उमेदवारी मागे घेतली आहे. पक्षप्रमुख एकनाथ शिंदे यांच्या सूचनेनुसार चिवटे यांनी हा निर्णय घेतल्याचे सांगितले. त्यामुळे भाजप आणि शिवसेनेच्या उमेदवारांमध्ये होणारी थेट लढत टळली असून, महायुतीच्या अधिकृत उमेदवाराचा मार्ग मोकळा झाला आहे.

नेमकं पडद्यामागे काय घडलं?

पुणे शिक्षक मतदारसंघात भाजप आणि शिवसेना या दोन्ही मित्रपक्षांनी स्वतंत्र उमेदवार उभे केल्यामुळे महायुतीसमोर पेच निर्माण झाला होता. शिवसेनेकडून मंगेश चिवटे यांना अधिकृत एबी फॉर्मही देण्यात आला होता. त्यामुळे त्यांच्या उमेदवारीकडे राजकीय वर्तुळाचे लक्ष लागले होते.

मात्र, महायुतीतील जागावाटप आणि समन्वयाच्या पार्श्वभूमीवर पक्षाने माघारीचा निर्णय घेतल्याचे सांगितले जात आहे. एकनाथ शिंदे यांच्या आदेशानुसार चिवटे यांनी निवडणुकीतून माघार घेतली. या घडामोडीमुळे पुण्यातील शिक्षक मतदारसंघाची निवडणूक आता नव्या राजकीय समीकरणांसह पुढे जाणार आहे.

हेही वाचा : Ashok Kharat Case: अशोक खरातच्या अडचणी वाढल्या! आर्थिक फसवणूक प्रकरणात 14 दिवसांची न्यायालयीन कोठडी

मंगेश चिवटेंना शिंदेंचा शब्द ( Mangesh Chivte )

मंगेश चिवटे ( Mangesh Chivte ) यांनी अनेक वर्षे सामाजिक आणि आरोग्य क्षेत्रात काम केले असून, त्यांची ओळख आरोग्यदूत म्हणून निर्माण झाली आहे. शिक्षकांसाठीही त्यांनी काम केल्याने त्यांना उमेदवारी मिळावी, अशी कार्यकर्त्यांची इच्छा होती, असे शिवसेनेचे नेते रवींद्र धंगेकर यांनी सांगितले.

मंगेश चिवटे यांना पुढे भविष्यात योग्य संधी दिले जाईल, असा शब्द एकनाथ शिंदे यांनी दिल्याचेही धंगेकरांनी सांगितले. पक्षाच्या आदेशाचे पालन करत चिवटे यांनी माघार घेतली असली, तरी सहकाऱ्याने निवडणुकीतून माघार घेतल्याची खंत असल्याचे त्यांनी नमूद केले.

पक्षश्रेष्ठींच्या निर्णयानुसार आता पुढील काळात महायुतीच्या उमेदवारांसाठी मोठा प्रचार केला जाईल, असेही धंगेकरांनी सांगितले. जागावाटपातील तडजोडीमुळे हा निर्णय घेण्यात आल्याचे त्यांच्या वक्तव्यातून स्पष्ट झाले.

पदवीधर मतदारसंघातही बंडखोरी थंडावली

शिक्षक मतदारसंघाप्रमाणेच पुणे पदवीधर मतदारसंघातही महायुतीसमोरील अडचण दूर झाल्याचे चित्र आहे. महायुतीचे बंडखोर उमेदवार भैय्या माने यांनीही निवडणुकीतून माघार घेतल्याची माहिती आहे.

या माघारींमुळे दोन्ही मतदारसंघांतील महायुतीच्या उमेदवारांना दिलासा मिळाला आहे. शिक्षक मतदारसंघात भाजपचे कौस्तुभ गावडे, तर पदवीधर मतदारसंघात स्मिता जाधव हे महायुतीचे अधिकृत उमेदवार असल्याचे सांगण्यात आले आहे.

चिवटेंच्या राजकीय भवितव्याची चर्चा

मंगेश चिवटे यांच्या माघारीमुळे महायुतीतील अंतर्गत समन्वयाचा मुद्दा पुन्हा चर्चेत आला आहे. एका बाजूला पक्षादेशाचे पालन करत उमेदवारी मागे घेण्याचा निर्णय, तर दुसऱ्या बाजूला भविष्यात संधी देण्याबाबत दिलेला शब्द, या दोन्ही बाबी राजकीयदृष्ट्या महत्त्वाच्या मानल्या जात आहेत.

आता पुणे शिक्षक आणि पदवीधर मतदारसंघांत महायुतीचे उमेदवार कशी रणनीती आखतात आणि मतदारांचा कौल कोणाच्या बाजूने जातो, याकडे राजकीय वर्तुळाचे लक्ष लागले आहे. मंगेश चिवटे यांना भविष्यात कोणती जबाबदारी किंवा संधी मिळते, हे पाहणेही महत्त्वाचे ठरणार आहे.