Sensex Nifty Market Update : आठवड्याच्या पहिल्याच दिवशी सोमवारी देशांतर्गत शेअर बाजाराची सुरुवात चांगली झाली. सकाळच्या सुमारास बाजार 195.05 अंकांच्या वाढीसह 85,426.97 वर व्यवहार करत होता. त्याच वेळी, एनएसई निफ्टी देखील 43.20 अंकांनी वाढून 26,111.35 वर व्यवहार करत होता. अहवालांनुसार, सुरुवातीच्या सत्रात टेक महिंद्रा, हिंडाल्को इंडस्ट्रीज, टीसीएस, डॉ. रेड्डीज लॅब्स आणि आयसीआयसीआय बँक हे निफ्टीवर प्रमुख वधारले, तर रिलायन्स इंडस्ट्रीज, एसबीआय लाईफ इन्शुरन्स, ट्रेंट, अपोलो हॉस्पिटल्स आणि सिप्ला हे घसरले. क्षेत्रीयदृष्ट्या, आयटी आणि पीएसयू बँक निर्देशांक 0.5-1 टक्क्यांनी वधारले.

सेन्सेक्स कंपन्यांमध्ये, टेक महिंद्रा, इन्फोसिस, एचसीएल टेक्नॉलॉजीज, टाटा कन्सल्टन्सी सर्व्हिसेस, एचडीएफसी बँक आणि मारुती हे सर्वात जास्त वधारले. मात्र, भारत इलेक्ट्रॉनिक्स, इटरनल, महिंद्रा अँड महिंद्रा आणि टाटा मोटर्स पॅसेंजर व्हेइकल्स हे घसरले. बीएसई मिडकॅप निर्देशांक स्थिर आहे, तर स्मॉलकॅप निर्देशांक 0.4% खाली आहे.

रुपया 49 पैशांनी वधारला :

सोमवारी रुपया विक्रमी नीचांकी पातळीवरुन सावरला आणि सुरुवातीच्या व्यापारात डॉलरच्या तुलनेत 49 पैशांनी वधारुन 89.17 वर पोहोचला, बँकांनी केलेल्या अमेरिकन डॉलर विक्रीमुळं आणि जागतिक कच्च्या तेलाच्या किमतीत घसरण झाल्यानं त्याला पाठिंबा मिळाला. फॉरेक्स व्यापाऱ्यांच्या मते, देशांतर्गत इक्विटी बाजारात चांगली सुरुवात आणि रिझर्व्ह बँक ऑफ इंडिया (आरबीआय) च्या हस्तक्षेपामुळं देशांतर्गत युनिटला पाठिंबा मिळाला. पीटीआयच्या वृत्तानुसार, रुपया डॉलरच्या तुलनेत 89.46 वर उघडला आणि नंतर 89.17 वर पोहोचला, जो त्याच्या मागील बंदपेक्षा 49 पैशांनी वाढला.

शुक्रवारी, रुपया 98 पैशांनी घसरून अमेरिकन डॉलरच्या तुलनेत 89.66 या त्याच्या नीचांकी पातळीवर बंद झाला. स्थानिक चलन 98 पैशांनी घसरुन अखेर अमेरिकन चलनाच्या तुलनेत 89.66 वर स्थिरावलं, जे तीन वर्षांहून अधिक काळातील सर्वात मोठी घसरण आहे.