ashok kharat : स्वयंघोषित अंकशास्त्रज्ञ अशोक खरात (Ashok Kharat) प्रकरणात दररोज नवनवीन धक्कादायक माहिती समोर येताना दिसत आहे. खरातच्या अटकेच्या अवघ्या तीन दिवस आधी शिर्डीत (shirdi) राज्यातील तीन IAS अधिकाऱ्यांसोबत त्याची गुप्त बैठक झाल्याचे समोर आले आहे. या बैठकीमुळे प्रकरण अधिक चिघळणार आहे. तर खरातला भेटणारे ते तीन IAS अधिकारी कोण? याची राज्यभरात चर्चा सुरु झालीय. ही बैठक शिर्डीतील एका नामांकित हॉटेलमध्ये पार पडल्याचे सांगितले जात आहे. ‘विनोद’ (vinod) नावाच्या व्यक्तीने ही भेट घडवून आणल्याची चर्चा आहे. शिर्डी परिसरात आरोपी कॅप्टन खरातचा विनोद नामक पंटर असल्याची माहिती समोर येत आहे.

हे ही वाचा: अशोक खरातच्या तोंडचे पाणी पळाले; राज्य सरकारचा मोठा निर्णय कोणता?

‘त्या’ तीन IAS अधिकाऱयांची चौकशी होणार का?

अटकेच्या अगोदर अशोक खरात याला भेटणाऱ्या राज्यातील त्या तीन IAS अधिकाऱयांची चौकशी करणार का? त्यासाठी SIT प्रमुख आयपीएस अधिकारी तेजस्विनी सातपुते यांच्या भूमिकेकडॆ लक्ष लागले आहे.

महिलांचे लैंगिक शोषण

दरम्यान, अशोक खरातवर महिलांच्या लैंगिक शोषणाचे गंभीर आरोप असून, त्याच्या ताब्यातून शंभरहून अधिक व्हिडिओ आढळल्याची माहिती समोर आली आहे. ‘तांत्रिक विधी’ आणि दैवी शक्तींच्या नावाखाली महिलांचा विश्वास संपादन करून त्यांचे शोषण केल्याचा संशय तपासात व्यक्त करण्यात आला आहे. या प्रकरणाच्या चौकशीसाठी राज्य सरकारने SIT स्थापन केली असून, आयपीएस अधिकारी तेजस्विनी सातपुते यांच्या नेतृत्वाखाली तपास सुरू आहे.

अनेक ठिकाणी मालमत्ता

तपासादरम्यान खरातच्या विविध ठिकाणी छापेमारी करण्यात आली असून, दोन लॅपटॉप, सुमारे 8 लाखांची रोकड, एक पिस्तूल, जिवंत काडतुसे आणि मालमत्तेची कागदपत्रे जप्त केल्याची माहिती समोर आली आहे. तसेच, नाशिकमधील आलिशान बंगला, कॅनडा कॉर्नर येथील कार्यालय आणि पाथर्डी परिसरातील सुमारे ३० एकर जमीन यासह मोठ्या प्रमाणात मालमत्ता असल्याचेही उघड झाले आहे.