Solapur municipal election AB form dispute : सोलापूर महानगरपालिकेची निवडणूक चांगलीच रंगतदार होत असताना भाजपच्या एबी फॉर्मवरून मोठा वाद उफाळून आला आहे. मंगळवारी दुपारी 3 वाजल्यानंतर निवडणूक निर्णय अधिकाऱ्याच्या कार्यालयाबाहेर भाजप नेत्यांविरोधात जोरदार घोषणाबाजी करण्यात आली. वेळ संपल्यानंतर भाजप आमदार सचिन कल्याणशेट्टी आणि शहराध्यक्ष रोहिणी तडवळकर हे उमेदवारांचे एबी फॉर्म घेऊन पोहोचल्याने भाजपच्या ३२ उमेदवारांचे भवितव्य टांगणीला लागले आहे.
हे ही वाचा : बृहन्मुंबई महानगरपालिका निवडणूकीसाठी 2 हजार 231 नामनिर्देशनपत्र वैध, तर 167 नामनिर्देशन अवैध
महाविकास आघाडीचे नेते आणि शिवसेना शिंदे गटाचे जिल्हाध्यक्ष अमोल शिंदे यांनी कार्यालया बाहेर ठिय्या मांडत, तीन वाजल्यानंतर कोणालाही आत प्रवेश नाही, अशी ठाम भूमिका घेतली. यावेळी भाजप नेत्यांसोबत जोरदार खडाजंगी झाली. बुधवारी संबंधित निवडणूक अधिकारी मरोड यांच्या कडून नेत्यांनी लेखी पत्र घेतले. त्यात दरवाजे बंद झाल्यानंतर खिडकीतून काही कागदपत्रे आली, मात्र ती भाजप उमेदवारांची एबी फॉर्म आहेत की नाही, याबाबत स्पष्टता नसल्याचा उल्लेख आहे.
या पार्श्वभूमीवर महाविकास आघाडी व शिंदें सेनेच्या नेत्यांनी महापालिका आयुक्त तथा मुख्य निवडणूक निर्णय अधिकारी डॉ. सचिन ओंबासे यांना निवेदन देत, ऍड. असीम सरोदे यांच्यामार्फत संबंधित प्रभागातील निवडणूक प्रक्रिया तात्काळ थांबवण्याची मागणी केली आहे.
