Sunetra Pawar Delhi visit political tension : राज्याच्या राजकारणात (Maharashtra Politics) नेमकं चाललंय काय? असा प्रश्न पडण्याला अनेक कारणं आहेत. आधी दादांच्या अपघातावरून रोहित पवारांनी अनेक नेत्यांच्या भेटीगाठी घेतल्या. त्यानंतर पार्थ पवारांनी (Parth Pawar) राज ठाकरेंची भेट घेतली, त्यानंतर पार्थ पवार तटकरेंची चर्चा झाली, त्यानंतर लगेच काल तटकरे (Sunil Tatkare) आणि फडणवीसांची चर्चा झाली. त्यात राष्ट्रवादीच्या विलीनीकरणावरून सध्या जोरदार वार-पलटवार सुरू आहेत. (Praful Patel) पटेल-तटकरे विरुद्ध शरद पवारांची राष्ट्रवादी असा सामना रंगलाय, अशातच उपमुख्यमंत्री आणि अजित पवारांच्या राष्ट्रवादीच्या सर्वेसर्वा सुनेत्रा पवार (Sunetra Pawar) या आज दिल्लीत (Delhi Tours) पोहोचल्या आहेत.

हेही वाचा – जालना महापालिकेचा पहिलाच 468 कोटी रुपयांचा अर्थसंकल्प जाहीर

वर्चस्वाच्या लढाईला नवे वळण मिळण्याची शक्यता

महाराष्ट्राच्या राजकारणात सध्या मोठी उलथापालथ पाहायला मिळत असून, राज्याच्या नवनियुक्त उपमुख्यमंत्री सुनेत्रा पवार यांचा अचानक झालेला दिल्ली दौरा चर्चेचा केंद्रबिंदू ठरला आहे. अजित पवार यांच्या निधनानंतर राष्ट्रवादी काँग्रेसमध्ये सुरू असलेल्या अंतर्गत संघर्षाच्या पार्श्वभूमीवर, सुनेत्रा पवार आज दिल्लीत भाजपच्या वरिष्ठ नेत्यांची आणि एनडीए मधील महत्त्वाच्या नेत्यांची भेट घेणार आहेत. त्यांच्या या दौऱ्यामुळे महाराष्ट्रातील आगामी राजकीय दिशा आणि पक्षावरील वर्चस्वाच्या लढाईला नवे वळण मिळण्याची शक्यता वर्तवण्यात येत आहे.

नियोजित राजकीय भेटीगाठींकडे सर्वांचे लक्ष

उपमुख्यमंत्री सुनेत्रा पवार बुधवारी रात्रीच दिल्लीत दाखल झाल्या आहेत. गुरुवारी सकाळी त्यांनी संसदेत हजेरी लावली. त्यांच्या नियोजित राजकीय भेटीगाठींकडे सर्वांचे लक्ष लागले आहे. अजित पवार यांच्या निधनानंतर राष्ट्रवादी काँग्रेसमध्ये नेतृत्वावरून दोन गट पडल्याचे चित्र निर्माण झाले आहे. एकीकडे प्रफुल्ल पटेल आणि सुनील तटकरे यांनी निवडणूक आयोगाला पत्र लिहून पक्षावरील हक्काबाबत भूमिका मांडली आहे, तर दुसरीकडे सुनेत्रा पवार यांनीही स्वतंत्र पत्र लिहून आपली नाराजी आणि दावा स्पष्ट केला आहे. या अंतर्गत वादाच्या काळात दिल्लीतील ‘हायकमांड’ची भूमिका निर्णायक ठरणार आहे.

महत्त्वाची भेट केंद्रीय गृहमंत्री अमित शाह यांच्यासोबत

सुनेत्रा पवार यांच्या दौऱ्यातील सर्वात महत्त्वाची भेट केंद्रीय गृहमंत्री अमित शाह यांच्यासोबत होणार असल्याचे समजते. महाराष्ट्रातील सत्तासंघर्ष आणि राष्ट्रवादी काँग्रेसमधील फुटीनंतर निर्माण झालेली परिस्थिती यावर या बैठकीत सविस्तर चर्चा होण्याची शक्यता आहे. भाजप नेतृत्वाचा पाठिंबा मिळवणे हे सुनेत्रा पवार यांच्यासाठी या घडीला अत्यंत आवश्यक आहे. सुनेत्रा पवार यांनी राज्यसभेचे सभापती सी. पी. राधाकृष्णन यांची भेट घेण्याचेही नियोजित केले आहे. संसदेतील कामकाजाव्यतिरिक्त राज्यातील काही प्रलंबित प्रश्नांवरही त्या चर्चा करू शकतात.

पटेल आणि तटकरे यांच्या भूमिकेमुळे सुनेत्रा पवार नाराज?

दिल्लीत मुक्कामी असताना त्या एनडीएच्या इतर मित्रपक्षांच्या नेत्यांचीही भेट घेणार आहेत. महायुतीमधील घटक पक्ष म्हणून राष्ट्रवादी काँग्रेसची ताकद टिकवून ठेवण्यासाठी आणि आगामी निवडणुकांच्या दृष्टीने ही चर्चा महत्त्वपूर्ण ठरेल. राष्ट्रवादी काँग्रेसमध्ये प्रफुल्ल पटेल आणि सुनील तटकरे यांनी घेतलेल्या भूमिकेमुळे सुनेत्रा पवार काहीशा नाराज असल्याचे बोलले जाते. पक्षाच्या अधिकृत पत्रांवरून झालेला वाद आता दिल्लीच्या वेशीवर पोहोचला आहे. सुनेत्रा पवार यांनी दिल्लीत येऊन आपली बाजू मांडण्याचा प्रयत्न केल्याने, त्या पक्षावर आपली पकड ढिली होऊ देऊ इच्छित नाहीत, हे स्पष्ट होत आहे. त्यांनी यापूर्वीच स्पष्ट केले आहे की, पक्षातील कार्यकर्त्यांचा विश्वास संपादन करणे आणि अजित दादांचा वारसा पुढे नेणे ही त्यांची प्राथमिकता आहे.

तर प्रफुल्ल पटेल आणि इतर नेत्यांना माघार घ्यावी लागू शकते

राजकीय विश्लेषकांच्या मते, सुनेत्रा पवार यांचा हा दौरा केवळ सांत्वनपर किंवा शिष्टाचार भेट नसून, तो पूर्णतः राजकीय अस्तित्वाची लढाई आहे. “अजित पवार यांच्या पश्चात सुनेत्रा पवार यांना भाजपचे केंद्रीय नेतृत्व किती महत्त्व देते, यावर राज्यातील महायुतीचे भवितव्य अवलंबून आहे. जर अमित शाह आणि पंतप्रधान मोदींनी सुनेत्रा पवारांना पूर्ण पाठिंबा दिला, तर प्रफुल्ल पटेल आणि इतर नेत्यांना माघार घ्यावी लागू शकते,” असे मत तज्ज्ञांनी व्यक्त केले आहे.

दिल्लीतील संदेश आणि पाठिंबा यावरच पुढील रणनीती ठरणार

आजच्या या भेटीगाठींनंतर सुनेत्रा पवार मुंबईला परततील. त्यानंतर त्या महाराष्ट्रात राष्ट्रवादी काँग्रेसच्या जिल्हाध्यक्षांची आणि प्रमुख कार्यकर्त्यांची मोठी बैठक बोलावण्याची शक्यता आहे. दिल्लीतून त्यांना मिळालेला संदेश आणि पाठिंबा यावरच त्यांच्या पुढील रणनीतीची आखणी केली जाईल. या दौऱ्यात त्या महाराष्ट्रातील दुष्काळ, रखडलेले प्रकल्प आणि केंद्राकडून अपेक्षित असलेली मदत यावरही काही केंद्रीय मंत्र्यांशी चर्चा करू शकतात. मात्र, सर्वांच्या नजरा केवळ आणि केवळ राजकीय घडामोडींवर खिळलेल्या आहेत. थोडक्यात सांगायचे तर, सुनेत्रा पवार यांचा हा दिल्ली दौरा महाराष्ट्राच्या राजकारणातील ‘पॉवर गेम’चा एक महत्त्वाचा भाग आहे. या दौऱ्यातून त्या स्वतःला अजित पवारांच्या राजकीय वारसदार म्हणून सिद्ध करण्याचा प्रयत्न करत आहेत.