Sanjay Raut: गेल्या अनेक दिवसांपासून सुरू असलेल्या मुसळधार पावसामुळे पुणे–मुंबई द्रुतगती महामार्गावरील मिसिंग लिंक प्रकल्पाच्या एका भागात भगदाड पडले. याबाबत विधानसभेत मुख्यमंत्री देवेंद्र फडणवीस यांनी सरकारच्या भूमिकेचे समर्थन करत प्रतिक्रिया दिली. या पार्श्वभूमीवर आज शिवसेना (उद्धव बाळासाहेब ठाकरे) पक्षाचे खासदार संजय राऊत यांनी पत्रकार परिषदेत सरकारवर घणाघाती टीका केली.

शिवसेना (उद्धव बाळासाहेब ठाकरे) पक्षाचे खासदार संजय राऊत (Sanjay Raut) यांनी राज्य सरकार आणि मुख्यमंत्री देवेंद्र फडणवीस (CM Devendra Fadanvis)  यांच्यावर जोरदार टीका करत महाराष्ट्राला “संस्कारी आणि लोकाभिमुख नेतृत्वाची गरज” असल्याचे मत व्यक्त केले. त्यांनी सरकारच्या कार्यपद्धतीवर, सार्वजनिक प्रकल्पांवरील खर्चावर (Missing Link Project) आणि सरकारविरोधात मत व्यक्त करणाऱ्यांवरील कथित दबावावर प्रश्न उपस्थित केले.

हेही वाचा: ऐन परीक्षेच्या तोंडावर पावसाचा अडथळा; आरोग्य विज्ञान विद्यापीठाच्या ९ जुलैच्या सर्व परीक्षा पुढे ढकलल्या

नेमकं काय म्हणाले संजय राऊत?

संजय राऊत म्हणाले की, सरकारमधील काही लोक जनतेबद्दल अपमानास्पद भाषा वापरत आहेत. “जनतेला कुत्रा म्हणतात, भाड्याचे तट्टू (Calling the public dogs you hired hack)  म्हणतात. मग याच जनतेकडून मतं कशी घेतली? आणि जर जनता भाड्याची तट्टू असेल, तर सत्तेपर्यंत पोहोचण्यासाठी तिचाच आधार घेतला का?” असा सवाल त्यांनी उपस्थित केला.

मुख्यमंत्री देवेंद्र फडणवीस यांच्यावर टीका

मुख्यमंत्री देवेंद्र फडणवीस यांच्यावर टीका करताना राऊत म्हणाले की, ते एखाद्या सुलतानाप्रमाणे वागत आहेत. त्यांच्या मते, सरकारविरोधात कोणी आवाज उठवला तर त्याच्यावर कठोर कारवाई केली जाते. त्यामुळे राज्यात अभिव्यक्ती स्वातंत्र्यावर मर्यादा येत असल्याचा आरोप त्यांनी केला आणि “महाराष्ट्रात एका प्रकारची आणीबाणी लागू असल्याची भावना निर्माण झाली आहे,” असेही ते म्हणाले.

विकास प्रकल्पांवर भाष्य

राज्यातील विकास प्रकल्पांवर (on development projects in the state) भाष्य करताना राऊत यांनी आरोप केला की, जनतेच्या करातून उभारले जाणारे अनेक प्रकल्प मूळ अंदाजापेक्षा जास्त खर्च करून पूर्ण केले जातात. त्यानंतर त्या प्रकल्पांचे मोठ्या प्रमाणावर प्रसिद्धीकरण केले जाते आणि त्याचे संपूर्ण श्रेय सरकार घेत असल्याचा आरोप त्यांनी केला. मात्र, काही प्रकल्पांमध्ये तांत्रिक त्रुटी, भगदाडे किंवा दुर्घटना घडल्यावर सरकार जबाबदारी स्वीकारत नसल्याचेही त्यांनी म्हटले.

राऊत यांनी पुढे सांगितले की, अशा घटनांनंतर नागरिकांनी समाजमाध्यमे, वृत्तपत्रे किंवा दूरचित्रवाणी माध्यमांद्वारे प्रश्न उपस्थित केले, तर त्यांनाच अपमानास्पद शब्दांनी हिणवले जाते. लोकशाहीमध्ये जनतेच्या मताचा आदर होणे आवश्यक असून, टीका स्वीकारण्याची संस्कृती सरकारने जोपासली पाहिजे, असे ते म्हणाले.

या पार्श्वभूमीवर राऊत यांनी महाराष्ट्राला लोकशाही मूल्यांचा सन्मान करणारे, जनतेशी सन्मानाने संवाद साधणारे आणि पारदर्शक कारभार करणारे “संस्कारी नेतृत्व” आवश्यक असल्याचे प्रतिपादन केले.

दरम्यान, या आरोपांवर सरकारकडून अधिकृत प्रतिक्रिया येणे अपेक्षित असून, सरकारने यापूर्वी अनेकदा विरोधकांचे आरोप फेटाळून लावत आपल्या विकासकामांचा आणि प्रशासनाच्या कार्यक्षमतेचा बचाव केला आहे.