IND vs NZ 2nd ODI : भारत आणि न्यूझीलंड यांच्यातील वनडे मालिकेतील दुसरा सामना राजकोटमधील निरंजन शाह स्टेडियमवर खेळला जाणार आहे. मालिकेतील पहिला सामना जिंकल्यानंतर टीम इंडिया सध्या मालिकेत 1-0 नं आघाडीवर आहे. दुसरा सामना जिंकून 2-0 अशी विजयी आघाडी घेण्याचं भारताचं लक्ष्य असेल, तर न्यूझीलंड हा सामना जिंकत मालिकेत बरोबरी करण्याचा प्रयत्न करेल.

राजकोटची खेळपट्टी कशी असेल :

राजकोटच्या निरंजन शाह स्टेडियमवरील खेळपट्टी फलंदाजांसाठी अनुकूल मानली जाते. चेंडू बॅटवर चांगल्या प्रकारे येतो, ज्यामुळं फलंदाजांना शॉट्स खेळणं सोपं होतं. सुरुवातीच्या षटकांमध्ये वेगवान गोलंदाजांना थोडीशी सीम हालचाल जाणवू शकते, परंतु सामना जसजसा पुढं सरकतो तसतसं खेळपट्टीवर फलंदाजी करणं सोपं होतं. प्रथम फलंदाजी करणाऱ्या संघानं या मैदानावर अनेकदा उच्च धावसंख्या नोंदवली आहे. फिरकी गोलंदाजांना इथं फारशी मदत मिळत नाही. मात्र, ते मधल्या षटकांमध्ये धावगती नियंत्रित करु शकतात. दुसऱ्या वनडे सामन्यादरम्यान चाहत्यांना उच्च धावसंख्या असलेल्या सामन्याची अपेक्षा आहे.

नाणेफेक ठरणार महत्त्वाची :

या स्टेडियमवर खेळल्या जाणाऱ्या वनडे सामन्यांमध्ये, पहिल्या डावातील सरासरी धावसंख्या सुमारे 300 आहे. अनेक वेळा 300 पेक्षा जास्त धावसंख्या झाल्या आहेत, ज्यावरुन फलंदाजांसाठी या खेळपट्टीवर खेळणं किती सोपं आहे हे दिसून येतं. आउटफिल्ड खूपच वेगवान आहे. नाणेफेक जिंकणारा संघ कदाचित प्रथम फलंदाजी करण्याचा निर्णय घेईल. आतापर्यंत इथं चार वनडे सामने खेळले गेले आहेत आणि प्रथम फलंदाजी करणाऱ्या संघानं सर्व सामने जिंकले आहे. त्यामुळं, या सामन्यात नाणेफेक महत्त्वाची भूमिका बजावेल.

दोन्ही संघांचा हेड टू हेड रेकॉर्ड :

भारत आणि न्यूझीलंडनं आतापर्यंत 121 वनडे सामने खेळले आहेत. यापैकी भारतानं 63 सामने जिंकले आहेत, तर न्यूझीलंडनं 50 सामने जिंकले आहेत. सात सामने निकालाशिवाय संपले आणि एक बरोबरीत सुटला. मात्र, अलीकडील विक्रम भारताच्या बाजूनं आहे, कारण भारतीय संघानं न्यूझीलंडविरुद्धच्या शेवटच्या पाचही वनडे सामन्यांमध्ये विजय मिळवला आहे.

लाईव्ह सामना कधी आणि कुठं पाहायचा? :

भारत आणि न्यूझीलंडमधील वनडे मालिकेतील पहिला सामना रविवार, 11 जानेवारी रोजी खेळला जाईल. सामना भारतीय वेळेनुसार दुपारी 1:30 वाजता सुरु होईल. नाणेफेक दुपारी 1 वाजता होईल. या सामन्याचं लाईव्ह स्ट्रीमिंग जिओ हॉटस्टारवर पाहता येईल. याव्यतिरिक्त, तुम्ही ब्रॉडकास्टर पाहण्यासाठी स्टार स्पोर्ट्स नेटवर्कला भेट देऊ शकता.

सामन्यासाठी दोन्ही संघ :

• भारत : शुभमन गिल (कर्णधार), रोहित शर्मा, विराट कोहली, केएल राहुल, श्रेयस अय्यर (उपकर्णधार), रवींद्र जडेजा, मोहम्मद सिराज, हर्षित राणा, प्रसिद्ध कृष्णा, कुलदीप यादव, ऋषभ पंत, नितीश कुमार रेड्डी, अर्शदीप सिंग, यशस्वी जैस्वाल, आयुष बडोनी.
• न्यूझीलंड : मायकेल ब्रेसवेल (कर्णधार), आदित्य अशोक, ख्रिश्चन क्लार्क, जोश क्लार्कसन, डेव्हॉन कॉनवे, जॅक फॉल्क्स, मिच हे, काइल जेमिसन, निक केली, जेडेन लेनोक्स, डॅरिल मिचेल, हेन्री निकोल्स, ग्लेन फिलिप्स, मायकेल रे, विल यंग.