Shimgotsav in Konkan : कोकणातील पारंपारिक शिमगोत्सवाची सांगता आता होतेय. रत्नागिरी जिल्ह्यातील खेड शहरात ग्रामदैवत श्रीदेवी पाथरजाई देवीच्या पालखीचा सीमा सोडण्याचा सोहळा मोठ्या भक्तिभावात संपन्न झाला. या सोहळ्याला हजारो भाविक उपस्थित होते. देवीला निरोप देताना अनेकांच्या डोळ्यांत भावुकता पाहायला मिळाली.

संपूर्ण कोकणात शिमगोत्सवाचा जल्लोष सुरू असताना खेड शहरातील ग्रामदैवत श्रीदेवी पाथरजाई देवीच्या पालखीची सीमा सोडण्याची परंपरा मोठ्या भक्तिभावात पार पडली. रात्रीच्या सुमारास देवीची पालखी देवळातून निघाली आणि शहरातील हजारो भाविक या पारंपारिक सोहळ्याला उपस्थित राहिले.देवीची मनोभावे पूजा करून भक्तांनी देवीला निरोप दिला. वर्षभर आपल्या भक्तांची काळजी घेणारी देवी पुन्हा मंदिरात परतते, तो क्षण प्रत्येक भाविकासाठी अत्यंत भावूक करणारा असतो.

वारसा पुढील पिढ्यांपर्यंत पोहोचवण्यासाठी युवा पिढीही मोठ्या उत्साहाने पुढे

या परंपरेत स्थानिक मानकरी आणि नागरिक मोठ्या उत्साहाने सहभागी होतात. परंपरा आणि श्रद्धेचा हा वारसा पुढील पिढ्यांपर्यंत पोहोचवण्यासाठी युवा पिढीही मोठ्या उत्साहाने पुढे येत असल्याचे मानकऱ्यांनी सांगितले.

पोलिसांनी देवीच्या पालखीला मानाचा नारळ अर्पण

3 या सोहळ्याचे आणखी एक वैशिष्ट्य म्हणजे खेड पोलीस स्टेशनकडून दिला जाणारा मानाचा नारळ. दरवर्षीप्रमाणे यंदाही पोलिसांनी देवीच्या पालखीला मानाचा नारळ अर्पण केला. इतकंच नाही तर पोलिसांनी स्वतः पालखी खांद्यावर घेऊन नाचवत उत्सवाचा आनंदही लुटला.

देवीसमोर प्रार्थना करत पुढील वर्षी पुन्हा याच भक्तिभावात भेटण्याची इच्छा

देवीला निरोप देताना भाविकांच्या मनात भावनांचा उहापोह दिसून आला. अनेक भाविकांनी देवीसमोर प्रार्थना करत पुढील वर्षी पुन्हा याच भक्तिभावात भेटण्याची इच्छा व्यक्त केली.