Tatkare Patel audio clip controversy : राष्ट्रवादी काँग्रेस पक्षात पुन्हा एकदा अंतर्गत संघर्ष, गटबाजी आणि नेतृत्वातील मतभेद चर्चेच्या केंद्रस्थानी आले आहेत. आमदार रोहित पवार यांनी पत्रकार परिषदेत केलेल्या गौप्यस्फोटानंतर राष्ट्रवादी काँग्रेस अजित पवार गटामध्ये मोठी राजकीय खळबळ उडाली आहे. उपमुख्यमंत्री अजित पवार यांच्याविषयी पक्षातील ज्येष्ठ नेते सुनील तटकरे आणि प्रफुल्ल पटेल यांनी अत्यंत आक्षेपार्ह भाषेत चर्चा केल्याचा दावा रोहित पवार यांनी केला. या कथित ऑडिओ क्लिप्सची संख्या एक-दोन नव्हे, तर तब्बल 19 असल्याची माहिती समोर येत आहे. या प्रकरणामुळे केवळ राष्ट्रवादी काँग्रेसमधील अंतर्गत समन्वयावर प्रश्नचिन्ह निर्माण झालेले नाही, तर नेतृत्वाच्या पातळीवरील विश्वास, निष्ठा आणि सत्ताकारणातील गटबाजी पुन्हा एकदा उघड झाल्याची चर्चा राजकीय वर्तुळात रंगू लागली आहे.

शरद पवार गटाचे आमदार रोहित पवार यांनी पत्रकार परिषद घेत या कथित ऑडिओ क्लिप्सचा मुद्दा उपस्थित केला. त्यांच्या मते, सुनील तटकरे आणि प्रफुल्ल पटेल यांनी अजित पवार यांच्याविषयी अत्यंत खालच्या पातळीची भाषा वापरत चर्चा केली होती. हे संभाषण केवळ राजकीय मतभेदापुरते मर्यादित नसून वैयक्तिक टीकेच्या पातळीवर गेले होते, असा दावा त्यांनी केला. या ऑडिओ क्लिप्समुळेच पक्षाच्या कार्यकारणीत मोठे बदल करण्यात आले. काही नेत्यांना बाजूला ठेवण्यामागेही या संभाषणांचा प्रभाव असल्याची चर्चा त्यांनी माध्यमांसमोर मांडली.

ऑडिओ क्लिप्सच्या चर्चेने राजकीय क्षेत्रात खळबळ

ऑडिओ क्लिप्सच्या चर्चेने राजकीय क्षेत्रात खळबळ उडाली आहे. या संपूर्ण प्रकरणात सर्वाधिक चर्चेचा मुद्दा ठरत आहे तो म्हणजे कथित १९ ऑडिओ क्लिप्सचा. माहितीनुसार, या क्लिप्समध्ये विविध टप्प्यांवर पक्षातील वरिष्ठ नेत्यांमध्ये झालेले संभाषण असल्याचा दावा केला जात आहे. या क्लिप्समधील चर्चा, भाषाशैली आणि त्यातील आरोप यामुळे पक्षात मोठी अस्वस्थता निर्माण झाल्याचे बोलले जात आहे. या क्लिप्सपैकी काही क्लिप्स दिल्लीतील राष्ट्रवादी काँग्रेसच्या एका वरिष्ठ नेत्यामार्फत अजित पवार यांच्यापर्यंत पोहोचवण्यात आल्याची माहिती समोर येत आहे. त्यावेळी वाद टाळण्यासाठी आणि पक्षात अधिक फूट पडू नये म्हणून अजित पवार यांनी या प्रकरणाकडे दुर्लक्ष केल्याचे सांगितले जात आहे.

अजित पवार यांच्या कुटुंबीयांपर्यंतही या कथित क्लिप्स पोहोचल्या

राजकीय सूत्रांकडून मिळालेल्या माहितीनुसार, अजित पवार यांच्या कुटुंबीयांपर्यंतही या कथित क्लिप्स पोहोचल्या होत्या. विशेषतः सुनेत्रा पवार आणि पार्थ पवार यांनीही त्या ऐकल्याचा दावा रोहित पवार यांनी केला आहे. यामुळे या प्रकरणाला केवळ राजकीयच नव्हे, तर कौटुंबिक आणि भावनिक स्वरूपही प्राप्त झाले आहे. पक्षातील वरिष्ठ नेत्यांमध्ये इतक्या गंभीर स्वरूपाचे मतभेद आहेत का, असा प्रश्नही आता उपस्थित होऊ लागला आहे.

आर्थिक मुद्द्यांमुळेच पक्षातील काही वरिष्ठ नेत्यांमध्ये संघर्ष

या क्लिप्सचा संबंध पक्षाच्या आर्थिक व्यवहारांशी जोडला जात असल्याची चर्चा आहे. पक्षाच्या निधीतून काही खासगी खर्च भागवण्यात आल्याची बाब अजित पवार यांच्या निदर्शनास आल्यानंतर ते नाराज झाल्याचे सांगितले जात आहे. घरभाडे, ब्युटी पार्लर बिल यांसारख्या खासगी खर्चांसाठी पक्षाच्या खात्यातील पैशांचा वापर झाल्याचा आरोप करण्यात येत आहे. याच पार्श्वभूमीवर काही नेत्यांमध्ये अंतर्गत चर्चा झाली आणि त्यानंतर या ऑडिओ क्लिप्सचा विषय पुढे आल्याचे बोलले जात आहे. या आर्थिक मुद्द्यांमुळेच पक्षातील काही वरिष्ठ नेत्यांमध्ये संघर्ष अधिक तीव्र झाल्याची शक्यता व्यक्त केली जात आहे.

प्रफुल्ल पटेल यांच्याकडून भूमिका स्पष्ट न झाल्याने प्रश्न अधिक गडद

या सर्व आरोपांदरम्यान सुनील तटकरे यांनी काही प्रमाणात प्रतिक्रिया दिली. त्यांनी स्पष्ट केले की, अजित पवार यांच्या आवाजातील किंवा नावाशी संबंधित अनेक ऑडिओ आणि व्हिडिओ क्लिप्स सोशल मीडियावर फिरत आहेत. त्यापैकी अनेक क्लिप्स या खोट्या, एडिट केलेल्या आणि दिशाभूल करणाऱ्या असल्याचा आरोप त्यांनी केला. काही स्वार्थी राजकीय शक्ती बदनामी करण्यासाठी आणि राष्ट्रवादी काँग्रेसमध्ये गोंधळ निर्माण करण्यासाठी अशा क्लिप्सचा वापर करत असल्याचे तटकरे यांनी म्हटले आहे. मात्र, त्यांनी थेट रोहित पवारांच्या आरोपांवर सविस्तर भाष्य केलेले नाही. प्रफुल्ल पटेल यांच्याकडूनही अद्याप अधिकृत आणि स्पष्ट भूमिका समोर आलेली नाही. त्यामुळे या कथित क्लिप्सचे सत्य काय, हा प्रश्न अधिकच गडद होत चालला आहे.