IPL 2026हैदराबाद : आयपीएल 2026 मध्ये शुक्रवारी दोन बलाढ्य संघांमध्ये महामुकाबला रंगणार आहे. एका बाजूला गुणतालिकेत अव्वल स्थानावर असलेली रॉयल चॅलेंजर्स बंगळुरू तर दुसऱ्या बाजूला तिसऱ्या क्रमांकावर असलेली सनरायझर्स हैदराबाद आमनेसामने असणार आहेत. दोन्ही संघांचा हा अखेरचा लीग सामना असून टॉप-2 मध्ये स्थान मिळवण्यासाठी ही लढत अत्यंत महत्त्वाची ठरणार आहे.

आयपीएल 2026 च्या लीग टप्प्यातील सर्वात मोठा आणि शेवटचा सामना आज म्हणजेच शुक्रवार, 22 मे रोजी सनरायझर्स हैदराबाद आणि विद्यमान विजेता रॉयल चॅलेंजर्स बंगळुरू यांच्यात खेळवला जाणार आहे. हैदराबादच्या राजीव गांधी आंतरराष्ट्रीय स्टेडियमवर होणारा हा सामना दोन्ही संघांसाठी खास ठरणार आहे. दोन्ही संघांनी आधीच प्लेऑफमध्ये प्रवेश निश्चित केला असला तरी गुणतालिकेत अव्वल दोनमध्ये स्थान मिळवण्यासाठी ही चुरशीची लढत असणार आहे.

राजीव गांधी स्टेडियमची पिच रिपोर्ट

हैदराबादची खेळपट्टी यंदाच्या हंगामात फलंदाजांसाठी स्वर्गच ठरली आहे. आजच्या सामन्यातही धावांचा पाऊस पडण्याची शक्यता आहे. याच मैदानावर झालेल्या मागील सामन्यात सनरायझर्स हैदराबादने पंजाब किंग्जविरुद्ध प्रथम फलंदाजी करताना 235 धावांचा प्रचंड डोंगर उभारला होता आणि सामना जिंकला होता. खेळपट्टीवर चांगली उसळी आणि वेग असल्यामुळे चेंडू सहज बॅटवर येतो, त्यामुळे पॉवरप्लेमध्ये वेगाने धावा काढणे सोपे जाते.

हैदराबादचे हवामान कसे असेल?

क्रिकेट चाहत्यांसाठी हवामानाबाबत आनंदाची बातमी आहे. सामन्यादरम्यान आकाश पूर्णपणे स्वच्छ राहणार असून थंड वारे वाहतील. त्यामुळे संपूर्ण 40 षटकांचा सामना कोणत्याही अडथळ्याशिवाय पाहायला मिळणार आहे. रात्रीचे किमान तापमान 28 अंश सेल्सिअस राहण्याचा अंदाज आहे. मात्र, दमट वातावरणामुळे खेळाडूंना 29 अंश सेल्सिअस इतकी उष्णता जाणवू शकते. पावसाची शक्यता केवळ 1 ते 3 टक्के इतकी नगण्य आहे. दरम्यान, मैदानावर ताशी 20 किमी वेगाने वारे वाहतील आणि काहीवेळा झोतांचा वेग 48 किमी प्रतितासापर्यंत पोहोचू शकतो. त्यामुळे उंच फटके खेळताना फलंदाजांना सावध राहावे लागेल.

हेड टू हेड आकडेवारी

आयपीएल इतिहासात या दोन्ही संघांमध्ये नेहमीच चुरशीचे सामने झाले आहेत. आतापर्यंत दोन्ही संघांमध्ये एकूण 26 सामने झाले असून त्यापैकी सनरायझर्स हैदराबादने 14 सामने जिंकले आहेत, तर रॉयल चॅलेंजर्स बंगळुरूने 12 सामन्यांत विजय मिळवला आहे. यंदाच्या हंगामात पहिल्यांदा दोन्ही संघ आमनेसामने आले तेव्हा बंगळुरूने हैदराबादचा पराभव केला होता.

संभाव्य प्लेइंग इलेव्हन

सनरायझर्स हैदराबाद :
अभिषेक शर्मा, ईशान किशन (यष्टिरक्षक), हेनरिक क्लासेन, सलिल अरोरा, स्मरण रविचंद्रन, नितीश कुमार रेड्डी, पॅट कमिन्स (कर्णधार), शिवांग कुमार, ईशान मलिंगा, साकिब हुसेन, प्रफुल्ल हिंगे।

रॉयल चॅलेंजर्स बंगळुरू :
विराट कोहली, देवदत्त पडिक्कल, वेंकटेश अय्यर, रजत पाटीदार (कर्णधार), जितेश शर्मा (यष्टिरक्षक), टिम डेविड, रोमारियो शेफर्ड, कृणाल पंड्या, भुवनेश्वर कुमार, जोश हेजलवुड, सुयश शर्मा।