Sikandar Sheikh Thar Accident: सांगली जिल्ह्यातील कवठेमहांकाळ तालुक्यातील विठ्ठलवाडी परिसरात राष्ट्रीय महामार्गावर एका थार वाहनाचा अपघात झाल्याची घटना समोर आली आहे. या अपघातानंतर परिसरात मोठी चर्चा रंगली असून संबंधित वाहन हे पैलवान सिकंदर शेख यांच्या मालकीचे असल्याची माहिती समोर येत आहे.

प्राथमिक माहितीनुसार, वाहन महामार्गावरून प्रवास करत असताना चालकाचे नियंत्रण सुटल्याने ते रस्त्यालगतच्या दुभाजकावर जाऊन आदळले. धडकेचा जोर मोठा असल्याने वाहनाचे मोठ्या प्रमाणात नुकसान झाले आहे.

हेही वाचा: थकीत ऊस बिलांसाठी सोलापुरात शेतकऱ्यांचे जलआंदोलन; प्रशासनासमोर मोठे आव्हान

घटनेची माहिती मिळताच स्थानिक नागरिकांनी मदतीसाठी घटनास्थळी धाव घेतली. तसेच महामार्ग पोलिसांनीही तातडीने घटनास्थळी पोहोचून परिस्थितीचा आढावा घेतला.

दरम्यान, अपघाताच्या वेळी वाहनात नेमके कोण उपस्थित होते, याबाबत अद्याप अधिकृत माहिती समोर आलेली नाही. पैलवान सिकंदर शेख स्वतः वाहनात होते की नाही, याबाबतही प्रशासनाकडून कोणतीही पुष्टी करण्यात आलेली नाही.

पोलिसांकडून वाहनातील प्रवाशांची माहिती, अपघाताचे नेमके कारण आणि संभाव्य जखमींबाबत तपास सुरू असून अधिकृत अहवालानंतरच संपूर्ण चित्र स्पष्ट होणार आहे. या घटनेमुळे परिसरात काही काळ वाहतुकीवरही परिणाम झाल्याचे सांगण्यात येत आहे.