Abhijeet Dipke News: मुंबईतील मरीन ड्राईव्ह परिसरात अभिजीत दिपके यांच्यासोबत घडलेल्या घटनेचा व्हिडीओ सध्या सोशल मीडियावर चर्चेत आहे. २ ऑक्टोबरच्या आंदोलनाच्या पार्श्वभूमीवर घडलेल्या या प्रकारात पोलिसांनी त्यांना काही काळ पोलीस ठाण्यात नेल्याची माहिती समोर आली आहे. नेमकं काय घडलं? पाहा व्हायरल VIDEO.
Abhijeet Dipke News: मुंबईतील मरीन ड्राईव्ह परिसरात कॉकरोच जनता पार्टीचे (CJP) संस्थापक अभिजीत दिपके (Abhijeet Dipke) यांना पोलिसांनी काही काळ पोलीस ठाण्यात नेल्याची घटना समोर आली आहे. २ ऑक्टोबर रोजी होणाऱ्या प्रस्तावित आंदोलनाच्या पार्श्वभूमीवर दिपके समर्थकांसह फलक घेऊन मरीन ड्राईव्हवर पोहोचले होते. या घटनेचा संपूर्ण व्हिडीओ सध्या सोशल मीडियावर ( Abhijeet Dipke Viral Video) मोठ्या प्रमाणात व्हायरल होत आहे.
मरीन ड्राईव्हवर नेमकं काय घडलं?
मिळालेल्या माहितीनुसार, दिपके काही समर्थकांसोबत मरीन ड्राईव्ह परिसरात फलक घेऊन उभे होते. त्यावेळी एका महिला पोलीस अधिकाऱ्यासह पोलिसांचे पथक त्यांच्याजवळ पोहोचले. त्यानंतर दिपके आणि त्यांच्या समर्थकांना मरीन ड्राईव्ह पोलीस ठाण्यात नेण्यात आले.
पोलिसांच्या म्हणण्यानुसार, दिपके यांना काही काळ पोलीस ठाण्यात ठेवण्यात आले आणि त्यानंतर त्यांची सुटका करण्यात आली. या संपूर्ण प्रकारचा व्हिडिओ सोशल मीडियावर समोर आल्यानंतर तो मोठ्या प्रमाणात शेअर केला जात आहे.
चहासाठी या असं सांगून नेलं – दिपकेंचा दावा
या घटनेबाबत अभिजित दिपके यांनी वेगळी माहिती दिली आहे. त्यांच्या म्हणण्यानुसार, एका महिला पोलीस अधिकाऱ्याने त्यांना चहासाठी सोबत येण्यास सांगितले. त्यानंतर त्यांना पोलीस ठाण्यात नेण्यात आले आणि काही वेळाने सोडण्यात आले. दिपके यांनी असा दावा केला की, त्यांना प्रत्यक्षात चहा देण्यात आला नाही.
मात्र, मुंबई पोलिसांनी दिपके यांना औपचारिकरीत्या ताब्यात घेतल्याचा दावा नाकारला आहे. पोलिसांच्या माहितीनुसार, ते मरीन ड्राईव्हवर नागरिकांशी संवाद साधत होते आणि तिथे तैनात असलेल्या पोलिसांशीही चर्चा करत होते.
View this post on Instagram
२ ऑक्टोबरच्या आंदोलनाच्या पार्श्वभूमीवर घडामोडी
ही घटना CJP च्या २ ऑक्टोबर रोजी मुंबईत प्रस्तावित आंदोलनाच्या एक दिवस आधी घडली. CJP ने मुख्य निवडणूक आयुक्त ज्ञानेश कुमार यांच्या राजीनाम्याची मागणी करत आंदोलनाची घोषणा केली आहे. सुरुवातीला शिवाजी पार्क येथे आंदोलन करण्याचे नियोजन होते; मात्र मुंबई पोलिसांनी त्याला परवानगी नाकारली होती. त्यानंतर दिपके यांनी ‘जेल भरो आंदोलन’ करण्याची घोषणा केली.
पोलिसांनी परवानगी नाकारताना सार्वजनिक व्यवस्था, वाहतूक आणि आपत्कालीन वाहनांच्या हालचालींसह विविध बाबींचा विचार केल्याचे वृत्त आहे. CJPने मात्र आंदोलन सुरू ठेवण्याची भूमिका घेतली आहे.
CJPकडून दिपके यांच्या ताब्याच्या बातमीवर स्पष्टीकरण
दुसरीकडे, CJPशी संबंधित व्यक्तींनी दिपके यांना अटक झाल्याच्या काही वृत्तांना ‘फेक न्यूज’ असल्याचे म्हटले आहे. CJPकडून दिपके मुंबईतच असल्याचे सांगण्यात आले. त्यामुळे या प्रकरणात ‘अटक’ आणि ‘काही काळ पोलीस ठाण्यात नेणे’ याबाबत वेगवेगळे दावे समोर आले आहेत.
आंदोलन पुढेही सुरू ठेवण्याची भूमिका
दिपके यांनी त्यांच्या आंदोलनाची दिशा स्पष्ट करत, मागण्या मान्य न झाल्यास आंदोलनाचा विस्तार करण्याची भूमिका मांडली आहे. CJPचे आंदोलन हे इतर विरोधी पक्षांच्या प्रस्तावित आंदोलनापेक्षा स्वतंत्र असल्याचेही त्यांनी स्पष्ट केले आहे.
दरम्यान, २ ऑक्टोबरच्या आंदोलनाच्या पार्श्वभूमीवर मुंबईतील विविध ठिकाणी सुरक्षा व्यवस्था वाढवण्यात आली आहे. आता CJPच्या पुढील आंदोलनादरम्यान काय घडते, याकडे लक्ष लागले आहे
