Shweta Tiwari: टीव्ही अभिनेत्री श्वेता तिवारी (Shweta Tiwari) सध्या ‘द ट्रेटर्स’च्या दुसऱ्या पर्वामुळे चर्चेत आहे. मात्र सोशल मीडियावरील एका पोस्टमुळे ती पुन्हा चर्चेच्या केंद्रस्थानी आली आहे. श्वेताने इंस्टाग्राम स्टोरीवर काही स्क्रीनशॉर्ट शेअर करत तिला सोशल मीडियावर अपमानास्पद आणि आक्षेपार्ह संदेश पाठवले जात असल्याचा दावा केला आहे.
विशेष म्हणजे, या पोस्टमध्ये तिने स्वतःला मराठी आणि राज ठाकरे यांचे समर्थक म्हणवणाऱ्या काही सोशल मीडिया युजर्सची उल्लेख केला. महिलांना ऑनलाईन अशा प्रकारे लक्ष्य करणाऱ्या मानसिकतेवर श्वेताने नाराजी व्यक्त केली आहे.
हेही वाचा: अमित शाहांच्या NUCFDCवर राऊतांचा निशाणा; ‘नागरी सहकारी बँकांचे अस्तित्व धोक्यात’
महिलांना शिवीगाळ करणं इतकं सहज कसं?
श्वेताने (Shweta Tiwari) आपल्या पोस्टमधून सोशल मीडियावरील (Shweta Tiwari Instagram) महिलांविरोधातील आक्षेपार्ह भाषेचा मुद्दा उपस्थित केला. तिच्या म्हणण्यानुसार, एखाद्या महिलेच्या मतांशी किंवा कृतीशी असहमती असली तरी तिला शिवीगाळ करणे योग्य ठरू शकत नाही.
तिने विशेषतः या गोष्टीकडे लक्ष वेधले की, अशा कमेंट्स करणारे सर्वच लोक अशिक्षित असतात असे नाही. अनेकजण शिक्षित आणि सामाजिकदृष्ट्या प्रतिष्ठित कुटुंबांमधून आलेले असतात. त्यामुळे घरातील महिलांचा सन्मान करणारे लोक सोशल मीडियावर दुसऱ्या महिलेबद्दल इतकी आक्षेपार्ह भाषा कशी वापरू शकतात, असा सवाल तिने उपस्थित केला.
काही युजर्सचे स्क्रीनशॉटही शेअर
आपल्याला पाठवण्यात आलेल्या कथित आक्षेपार्ह संदेशांपैकी काहींचे स्क्रीनशॉट श्वेताने इन्स्टाग्राम स्टोरीवर शेअर केले. या स्क्रीनशॉटमधील काही प्रोफाइल्स स्वतःला मराठी किंवा राज ठाकरे समर्थक असल्याचे दर्शवत असल्याचा दावा तिने केला.
याच पार्श्वभूमीवर श्वेताने आपला महाराष्ट्राशी असलेला संबंधही पोस्टमध्ये मांडला. महाराष्ट्रात आपले आयुष्य गेले असून, मराठी संस्कृती आणि मराठी असण्याबद्दल तिला कायम अभिमान वाटत असल्याचे तिने सांगितले.
मराठी माणूस असण्याचा अर्थ हाच आहे का?
श्वेताच्या (Shweta Tiwari) पोस्टमधील सर्वाधिक चर्चेत आलेला मुद्दा म्हणजे तिचा ‘मराठी माणूस’ या ओळखीबाबतचा सवाल.
महिलांचा सन्मान करणे ही मराठी संस्कृतीची महत्त्वाची ओळख असल्याचा तिचा विश्वास असल्याचे तिने म्हटले. त्यामुळे स्वतःला अभिमानाने मराठी म्हणवणारे काही लोक महिलांना सोशल मीडिया किंवा खासगी संदेशांमध्ये शिवीगाळ करत असतील, तर अशा वर्तनाला मराठी संस्कृतीशी कसे जोडता येईल, असा प्रश्न तिने उपस्थित केला.
राज ठाकरेंना थेट सवाल
या पोस्टमध्ये श्वेताने राज ठाकरे (Raj Thackeray) यांनाही थेट प्रश्न विचारला आहे. स्वतःला राज ठाकरे किंवा त्यांच्या पक्षाचे समर्थक म्हणवणाऱ्या व्यक्तींकडून महिलांशी अशा पद्धतीने वर्तन होत असेल, तर ते त्यांना मान्य आहे का, अशी भूमिका तिने मांडली.
तिच्या मते, केवळ मराठी भाषा बोलणे, महाराष्ट्रावर प्रेम असल्याचे सांगणे किंवा स्वतःला मराठी म्हणून ओळखणे पुरेसे नाही. महिलांचा आदर आणि त्यांचा सन्मान राखणेही तितकेच महत्त्वाचे आहे.
श्वेताची पोस्ट चर्चेत का आली?
श्वेता तिवारीच्या या पोस्टनंतर सोशल मीडियावर (Shweta Tiwari Social Media Post) वेगवेगळ्या प्रतिक्रिया उमटण्याची शक्यता आहे. ऑनलाइन ट्रोलिंग, महिलांना होणारी शिवीगाळ आणि राजकीय-सामाजिक ओळखीच्या नावाखाली होणाऱ्या आक्षेपार्ह वक्तव्यांचा मुद्दा या निमित्ताने पुन्हा चर्चेत आला आहे.
मात्र श्वेताने ज्या सोशल मीडिया युजर्सचा उल्लेख केला आहे, त्यांची राजकीय ओळख किंवा ते प्रत्यक्षात कोणत्या संघटनेचे समर्थक आहेत, याची स्वतंत्र पुष्टी झालेली आहे की नाही, हे स्पष्ट होणे महत्त्वाचे आहे.
सध्या श्वेताच्या पोस्टमधील सवालामुळे ‘महिलांचा ऑनलाइन सन्मान’, ‘मराठी अस्मिता’ आणि ‘समर्थकांच्या वर्तनाची जबाबदारी’ हे तीन मुद्दे चर्चेचा विषय बनले आहेत.
