Commercial LPG Cylinder : मध्य-पूर्वेतील वाढत्या तणावाच्या पार्श्वभूमीवर गॅस पुरवठ्यात व्यत्यय आल्यानं हॉटेल्स आणि रेस्टॉरंट्स व्यवसाय आधीच अडचणीत होते. त्यातच आता व्यावसायिक एलपीजी सिलिंडरच्या दरात झालेल्या मोठ्या वाढीमुळं हा उद्योग आणखी संकटात सापडला आहे.

हेही वाचा : बारावीचा निकाल आज जाहीर; राज्यात यंदाही कोकण विभागाने मारली बाजी,

नवीन दरवाढ मागे घेण्याची मागणी :

व्यावसायिक एलपीजी सिलिंडरच्या दरातील ताज्या दरवाढीनं हॉटेल उद्योगाला धक्का दिला असून परिस्थिती आणखी बिघडण्याची शक्यता निर्माण झाली आहे. उद्योग संघटनांनी सरकारच्या तात्काळ हस्तक्षेपाची आणि ही नवीनतम दरवाढ मागे घेण्याची मागणी केली आहे. 1 मे 2026 पासून व्यावसायिक एलपीजीच्या दरात ₹993 ची वाढ करण्यात आली आहे. या दरवाढीमुळं 19-किलोच्या व्यावसायिक एलपीजी सिलिंडरची किंमत आता विक्रमी ₹3,071.50 वर पोहोचली आहे.

तीनवेळा व्यावसायिक एलपीजीच्या दरात वाढ :

यापूर्वी, एप्रिलमध्ये व्यावसायिक एलपीजीच्या दरात ₹195.50 आणि मार्चमध्ये ₹144 नं वाढ करण्यात आली होती. फेडरेशन ऑफ हॉटेल अँड रेस्टॉरंट असोसिएशन्स ऑफ इंडियाचे (FHRAI) उपाध्यक्ष प्रदीप शेट्टी म्हणाले, “एलपीजीच्या दरात नुकत्याच झालेल्या वाढीमुळं, हॉटेलमध्ये मिळणाऱ्या जेवणाच्या खर्चात 10 ते 15 टक्के वाढ जवळपास निश्चित आहे. पण या वाढीतूनही खर्च पूर्णपणे भरुन निघणार नाही. 19 किलोच्या व्यावसायिक सिलेंडरच्या दरात तीन पटीनं झालेली वाढ, जी एकूण ₹1,332.50 आहे, यामुळं उद्योगाचा परिचालन खर्च अभूतपूर्व पातळीवर पोहोचला आहे. हे अशा वेळी घडत आहे, जेव्हा व्यवसाय आधीच पुरवठ्यातील व्यत्यय, मर्यादित परिचालन क्षमता आणि कमकुवत रोख प्रवाह यांसारख्या आव्हानांना तोंड देत आहेत.”

हॉटेल्स आणि रेस्टॉरंट्स ठप्प होण्याची शक्यता :

अनेक हॉटेल्स आणि रेस्टॉरंट्स आधीच मर्यादित तास, मर्यादित मेन्यू आणि पर्यायी इंधनाच्या व्यवस्थेसह कार्यरत आहेत. त्यामुळं, ही ₹993 ची वाढ त्यांच्या नफ्यावर दबाव आणेल आणि कामकाज अस्थिर करु शकते. अनेक हॉटेल्स आणि रेस्टॉरंट्स आधीच तात्पुरते बंद झाले आहेत आणि ही नवीन दरवाढ हॉटेल्स आणि रेस्टॉरंट्स बंद होण्याच्या आणि नोकरकपातीच्या प्रक्रियेला आणखी गती देऊ शकते, असं शेट्टी म्हणाले.