Rohit Pawar Meet Raj Thackeray | मागील काही दिवसांपासून आमदार रोहित पवार (Rohit Pawar) हे अजित पवारांना (Ajit Pawar) न्याय मिळवून देण्यासाठी प्रयत्न करताना दिसत आहेत. पण त्यांच्या प्रयत्नांना काहीही यश मिळत नसल्याचं दिसून येत आहे. तर अजित पवारांच्या विमान अपघाताची (Ajit Pawar Plane Crash) चौकशी नीट केली जात नाही, पोलीस स्थानकात गुन्हा दाखल केला जात नाही म्हणून आज (27 फेब्रुवारी) रोहित पवार हे मनसे प्रमुख राज ठाकरेंची (Raj Thackeray) भेट घेण्यासाठी शिवतीर्थ या निवासस्थानी गेले होते. आज मराठी भाषा गौरव दिन (Marathi Bhasha Gaurav Din) असून एका मराठी माणसाची तक्रार पोलीस नोंदवून घेत नाहीत, ही व्यथा रोहित पवारांनी राज ठाकरेंकडे मांडली.

हेही वाचा – अजित पवारांचा अपघात की घातपात? सीआयडीचा धक्कादायक खुलासा, तपासामध्ये काय आढळलं?

मनसेने आपल्याला पाठिंबा द्यावा म्हणून रोहित पवारांनी आज राज ठाकरेंची भेट घेतली. विमान कंपनीवर गुन्हा दाखल केला जात नाही आणि अजित पवारांच्या अपघाताची नीट चौकशी केली जात नाही म्हणून हा लढा लढण्यासाठी मनसेनं पाठिंबा द्यावा, यासाठी रोहित पवार राज ठाकरेंकडे गेले होते. याबाबत रोहित पवारांनी स्वत: माध्यमांसमोर येत राज ठाकरेंसोबत झालेल्या बैठकीत नेमकं काय झालं? याबाबतची माहिती दिली.

रोहित पवार आणि राज ठाकरेंमध्ये नेमकी काय चर्चा झाली?

माध्यमांशी बोलताना रोहित पवार म्हणाले की, मला राज ठाकरेंना अजितदादांच्या अपघात, घातपाताविषयी माहिती द्यायची होती. मी सर्व माहिती राज ठाकरेंना समजावून सांगितली आणि त्यांनी ती समजूनही घेतली. तसेच पोलिसांनी तक्रार दाखल का केली नाही? याबाबत राज ठाकरेंनी मला समजावून सांगितले. त्यांचा अभ्यास चांगला असल्यामुळे त्यांनी मला सुप्रीम कोर्टाचे दोन दाखले दिले. ज्यामध्ये अॅक्सीडेंटल डेथ रिपोर्ट झाला तर एफआयआर घेतलाच पाहिजे. दुसरा दाखल म्हणजे काहीही झाले तरी पोलिसांना एफआयआर घ्यावाच लागतो, असं राज ठाकरेंनी मला सांगितल्याची माहिती रोहित पवारांनी दिली.

मराठी माणसाला न्याय मिळवण्यासाठी जे काय करावं लागेल ते करू…

पुढे ते म्हणाले, राज ठाकरेंनी मला सांगितलं आहे की, मी दादांना ओळखत होतो. आम्ही दोघांनी जवळून काम केले आहे. जेव्हाही आमची भेट व्हायची तेव्हा आम्ही बोलायचो. जर मराठी माणसाला न्याय मिळत नसेल तर त्यासाठी जे काय करावं लागेल ते आम्ही करू, असंही रोहित पवारांनी सांगितलं.

दरम्यान, मराठी माणसाठी राज ठाकरे लढत आले आहेत. त्यामुळे राज ठाकरे नेमकी काय भूमिका घेतील हे येत्या काही काळात कळेलच, असंही रोहित पवार म्हणाले.