Ajit Pawar Accident Video | राज्याचे दिवंगत उपमुख्यमंत्री अजित पवार (Ajit Pawar) यांचा 28 जानेवारी 2026 रोजी विमान अपघात झाला होता. अजित पवारांच्या अपघातानंतर (Ajit Pawar Plane Crash) तो खरच अपघात होता की घातपात होता? अशा शंका व्यक्त केल्या जात आहेत. अशातच अजित पवारांच्या अपघाताला एक महिना उलटल्यानंतर आता त्यांचे पुत्र जय पवार (Jay Pawar) यांनी एक धक्कादायक व्हिडीओ शेअर केला आहे.

हेही वाचा – अजित पवार यांचा अपघात नाही तर 100 टक्के घातपात, राज्यातील मोठ्या नेत्याचे वक्तव्य

जय पवार यांनी त्यांच्या इन्स्टाग्राम अकाऊंटवर एक व्हिडिओ शेअर केला आहे. या व्हिडिओमध्ये, VSR कंपनीचे मालक रोहित सिंह (Rohit Singh) हा मुख्य पायलटच्या सीटवर बसलेला दिसत आहे. तर धक्कादायक गोष्ट म्हणजे विमान आकाशात असताना रोहित सिंह हा झोपलेला दिसत आहे. हा व्हिडिओ शेअर करत जय पवार यांनी संताप व्यक्त केला आहे.

जय पवार यांनी हा व्हिडिओ शेअर करत म्हटले आहे की, “माझ्या वडिलांना आपण गमावले… ही वेदना आयुष्यभर साथ देणार आहे. या व्हिडिओमध्ये VSR चे मालक रोहित सिंह मुख्य पायलटच्या सीटवर उड्डाणादरम्यान झोपलेले दिसत आहेत. आकाशात असताना असा निष्काळजीपणा असू शकत नाही. हे अत्यंत गंभीर आणि धक्कादायक आहे. मी DGCA ला ठामपणे मागणी करतो या प्रकरणात तात्काळ कठोर कारवाई व्हावी. संपूर्ण चौकशी होईपर्यंत VSR ची सर्व विमाने तात्काळ ग्राउंड करण्यात यावीत आणि रोहित सिंह यांना त्वरित अटक करून कठोर कायदेशीर कारवाई करण्यात यावी. ही एका मुलाची आर्त हाक आहे… माझ्या वडिलांसाठी आणि प्रत्येक प्रवाशाच्या सुरक्षिततेसाठी”, अशी मागणी जय पवार यांनी केली आहे.

दरम्यान, रोहित पवारांनी शेअर केलेल्या या धक्कादायक व्हिडिओनंतर संपूर्ण महाराष्ट्रात एकच खळबळ उडाली आहे. तसेच आता जय पवारांनी शेअर केलेल्या व्हिडिओनंतर दोषींवर कारवाई होणार का? असा सवाल सद्या उपस्थित केला जात आहे.