MPSC PSI Recruitment: पुण्यात MPSC विद्यार्थ्यांचे मोठे आंदोलन पाहायला मिळाले असून, पोलीस उपनिरीक्षक भरतीतील वयोमर्यादेच्या नियमांवरून वाद अधिक तीव्र झाला आहे. विद्यार्थ्यांचा आरोप आहे की भारतीची जाहिरात सुमारे ७ महिने उशिरा प्रसिद्ध झाली, मात्र वय गणनेची तारीख बदलली नसल्याने हजारो उमेदवार अपात्र ठरले आहेत.

विद्यार्थ्यांच्या म्हणण्यानुसार, परीक्षा जानेवारी २०२६ मध्ये होणार असून जाहिरात जुलै २०२५ मध्ये प्रसिद्ध झाली. तरीही वयाची गणना नोव्हेंबर २०२५ च्या आधारे केल्याने अनेक उमेदवार “ओव्हरएज” ठरले. यामुळे अनेक वर्षाचा अभ्यास आणि तयारी वाया गेल्याची भावना विद्यार्थ्यांमध्ये आहे.

हेही वाचा: मुंबई, कोकण, पुण्यासह अनेक भागांत मुसळधार पावसाची शक्यता; IMD चा मोठा इशारा

पुण्यातील शास्त्री रोड परिसरात मध्यरात्रीपासून विद्यार्थ्यांनी आंदोलन सुरू केले. हातात फलक घेऊन त्यांनी “वयोमर्यादा वाढवा” आणि “न्याय द्या” अशा घोषणा दिल्या. मोठ्या संख्येने विद्यार्था या आंदोलनात सहभागी झाले होते.

यावेळी विद्यार्थ्यांच्या प्रमुख मागण्या कोणत्या?

या आंदोलनात विद्यार्थ्यांनी स्पष्टपणे दोन प्रमुख मागण्या मांडल्या आहेत.

पहिली मागणी म्हणजे वयोमर्यादा किमान दोन वर्षांची सवलत देण्यात यावी.

दुसरी मागणी म्हणजे वय गणनेसाठी 1 जानेवारी 2025 ही तारीख गृहित धरावी, कारण ही परीक्षा 2025-26 च्या भरती प्रक्रियेतील आहे.

विद्यार्थ्यांचे म्हणणे आहे की आयोगाच्या उशिरामुळे उमेदवारांना अन्याय सहन करावा लागत आहे. UPSC सारख्या संस्थांमध्ये अधिक सुसंगत नियम लागू केले जातात, तसेच राज्यभरातील इतर भरती प्रक्रियांमध्ये वयोमर्यादेत सवलत देण्यात आली आहे, त्यामुळे MPSC मध्येही समान न्याय मिळावा अशी मागणी होत आहे.

राजकीय प्रतिक्रिया

या आंदोलनाची दखल काही राजकीय नेत्यांनी घेतली असून त्यांनी विद्यार्थ्यांच्या मागण्यांना पाठिंबा दर्शवला आहे. सरकारने तातडीने हस्तक्षेप करून योग्य निर्णय घ्यावा, अशी मागणी करण्यात येत आहे.

आंदोलनाचा इशारा

विद्यार्थ्यांनी स्पष्ट इशारा दिला आहे की मागण्या मान्य न झाल्यास आंदोलन अधिक तीव्र केले जाईल आणि राज्यभर विस्तार केला जाईल. या प्रकरणामुळे MPSC भरती प्रक्रिया आणि नियमांच्या अंमलबजावणीवर गंभीर प्रश्न उपस्थित झाले आहेत.