INDIA Aghadi Meeting: देशातील विरोधी पक्षांनी एकत्र आणण्याच्या प्रयत्नांना पुन्हा वेग देत इंडिया आघाडीची महत्वाची बैठक सोमवारी नवी दिल्लीत पार पडली. आगामी विधानसभा निवडणुका आणि २०२९ च्या लोकसभा निवडणुकांच्या पार्श्वभूमीवर विरोधी पक्षांची पुढील रणनीती ठरवण्यासाठी ही बैठक आयोजित करण्यात आली होती.

दिल्लीतील कॉन्स्टिट्यूशन क्लब येथे झालेल्या या बैठकीत काँग्रेसच्या वरिष्ठ नेत्या सोनिया गांधी, राहुल गांधी आणि पक्षाध्यक्ष मल्लिकार्जुन खरगे यांनी सहभाग घेतला. त्यांच्यासोबत तृणमूल काँग्रेसच्या ममता बॅनर्जी, समाजवादी पक्षाचे प्रमुख अखिलेश यादव, राष्ट्रीय जनता दलाचे नेते तेजस्वी यादव तसेच या बैठकीत शिवसेना (उद्धव बाळासाहेब ठाकरे गट) प्रमुख उद्धव ठाकरे हे ऑनलाईन माध्यमातून सहभागी झाले होते.

हेही वाचा : SSC कडून JSA आणि LDC पदांसाठी भरती; ‘या’ तारखेपर्यंत अर्ज करण्याची शेवटची संधी!

२५ पक्षांनी सहभाग नोंदवला

इंडिया आघाडीच्या अलीकडील बैठकीत एकूण २५ पक्षांनी सहभाग नोंदवला. या बैठकीत पाच महत्त्वाच्या मुद्द्यांवर एकमताने सविस्तर चर्चा करण्यात आली. देशातील सध्याच्या राजकीय, शैक्षणिक आणि आर्थिक परिस्थितीचा आढावा घेत विविध विषयांवर भूमिका निश्चित करण्यात आली.

एसआयआर (SIR) या मुद्द्यावर चर्चा

बैठकीत विशेषतः एसआयआर (SIR) या मुद्द्यावर चर्चा करण्यात आली असून, या संदर्भात सरन्यायाधीशांना पत्र पाठवण्याचा निर्णय घेण्यात आला आहे. तसेच नीट (NEET) परीक्षेतील कथित पेपरफुटी प्रकरणावर सविस्तर चर्चा करण्यात आली. या प्रकरणी केंद्रीय शिक्षणमंत्र्यांचा राजीनामा मागण्याचा निर्णय आघाडीने घेतला आहे.

देशाची अर्थव्यवस्था, शेतकऱ्यांचे प्रश्न आणि वाढती बेरोजगारी या विषयांवरही बैठकीत गंभीर चर्चा झाली. या समस्यांवर केंद्र सरकारला जबाबदार धरण्याबाबत आघाडीतील नेत्यांमध्ये एकमत झाले.

दर दोन महिन्यांनी बैठक होणार

आघाडीचे प्रमुख नेते मल्लिकार्जुन खरगे यांनी पुढील काळात दर दोन महिन्यांनी अशा बैठका आयोजित करण्याचा निर्णय जाहीर केला. तसेच इंडिया आघाडीची पुढील बैठक ८ ऑगस्ट रोजी हैदराबाद येथे होणार असल्याची माहिती देण्यात आली.

एकंदरीत, इंडिया आघाडीने विविध राष्ट्रीय मुद्द्यांवर एकत्रित भूमिका घेण्याचा निर्धार या बैठकीत व्यक्त केला असून, आगामी काळात सरकारविरोधात अधिक आक्रमक भूमिका घेण्याचे संकेत दिले आहेत.

बैठकीपूर्वी राजकीय वातावरण तापले

बैठकीच्या काही तास आधी दिल्लीतील अनेक भागांमध्ये विरोधी पक्षांवर टीका करणारे पोस्टर्स लावण्यात आले होते. विशेषतः काँग्रेस नेते राहुल गांधी यांना लक्ष्य करणाऱ्या या पोस्टर्सची राजकीय वर्तुळात चर्चा रंगली. विरोधी पक्षांच्या नेत्यांनी मात्र याकडे फारसे लक्ष न देता बैठकीच्या अजेंड्यावर भर दिला.