Sumith Fernando Death: भारत-श्रीलंका कसोटी मालिकेच्या पार्श्वभूमीवर श्रीलंकेच्या क्रिकेटविश्वातून धक्कादायक घटना समोर आली आहे.

माजी श्रीलंकन क्रिकेटपटू कुसल मेंडिस (Kusal Mendis Coach) यांच्या बालपणीच्या क्रिकेट प्रशिक्षणात महत्त्वाची भूमिका बजावणारे प्रशिक्षक सुमित फर्नांडो (Sumith Fernando Death) यांचा सामन्यादरम्यान झालेल्या वादानंतर मृत्यू झाला. या प्रकरणी पोलिसांनी एका 17 वर्षीय क्रिकेटपटूला ताब्यात घेतले आहे.

मैदानावरील किरकोळ वादाचे गंभीर परिणाम

8 ऑगस्ट रोजी कोलंबोमध्ये क्रिकेट सामना (Sri Lanka Cricket) सुरू असताना खेळाडूंमध्ये पिण्याच्या पाण्यावरून वाद निर्माण झाला. सुरुवातीला झालेली शाब्दिक बाचाबाची नंतर अधिक तीव्र झाली. याच वेळी 62 वर्षीय सुमित फर्नांडो यांनी या वादात हस्तक्षेप केल्याचे सांगितले जाते.

वाद वाढल्यानंतर फर्नांडो यांच्यावर कथित हल्ला करण्यात आला. त्यांना गंभीर दुखापत झाल्याने तातडीने रुग्णालयात दाखल करण्यात आले. वैद्यकीय उपचार सुरू असतानाच 11 ऑगस्ट रोजी त्यांची प्राणज्योत मालवली.

हेही वाचा: ‘धनुष्यबाण’ गोठणार, शिवसेना ठाकरेंकडे जाणार? वकिलाच्या दाव्याने नवा ट्विस्ट; नेमका गेम काय?

17 वर्षीय खेळाडू पोलिसांच्या ताब्यात

घटनेनंतर श्रीलंकन पोलिसांनी तपासाला सुरुवात केली. 10 ऑगस्ट रोजी एका 17 वर्षीय खेळाडूला अटक करण्यात आली. त्याला दुसऱ्या दिवशी कोलंबोतील न्यायालयात हजर करण्यात आले.

न्यायालयाने अल्पवयीन आरोपीला 17 ऑगस्टपर्यंत बाल सुधारगृहात ठेवण्याचे निर्देश दिले आहेत. या घटनेत आणखी कोणाचा सहभाग होता का, याचाही तपास सुरू आहे. सामन्यावेळी उपस्थित असलेल्या इतर खेळाडूंचीही चौकशी केली जात असल्याची माहिती आहे.

कुसल मेंडिस यांच्याशी विशेष नाते

सुमित फर्नांडो हे श्रीलंकेतील मोरातुवा येथील प्रिन्स ऑफ वेल्स कॉलेजमध्ये क्रिकेट प्रशिक्षक म्हणून कार्यरत होते. अनेक युवा क्रिकेटपटूंना त्यांनी प्रशिक्षण दिले होते.

कुसल मेंडिस यांच्या सुरुवातीच्या क्रिकेट प्रवासातही फर्नांडो यांचे मार्गदर्शन लाभले होते. त्यामुळे त्यांच्या निधनाची बातमी श्रीलंकेच्या क्रिकेटविश्वासाठी विशेष दुःखद ठरली आहे.

13 ऑगस्टला अंत्यसंस्कार

फर्नांडो यांच्या निधनानंतर श्रीलंकेतील क्रिकेटपटू, प्रशिक्षक आणि क्रिकेटप्रेमींनी शोक व्यक्त केला. 13 ऑगस्ट रोजी त्यांच्या पार्थिवावर अंत्यसंस्कार करण्यात आले.

क्रिकेटच्या मैदानावर सुरू झालेला किरकोळ वाद एवढ्या गंभीर घटनेत बदलल्याने या प्रकरणाची चर्चा श्रीलंकेच्या क्रिकेट वर्तुळात होत आहे. पोलिसांचा तपास पूर्ण झाल्यानंतर घटनेमागील नेमकी परिस्थिती आणि हल्ल्याची संपूर्ण पार्श्वभूमी स्पष्ट होण्याची शक्यता आहे.