राज्यात सध्या नगरपालिका आणि नगर पंचायत निवडणुकीची रणधुमाळी सुरू आहे. त्यासाठी अर्ज दाखल करण्यास सुरूवात झाली आहे. साताऱ्यातील कवी मनाचे नेते आणि बिग बाॅस फेम अभिजित बिचुकले यांनी सातारच्या नगराध्यक्ष पदासाठी आपला अपक्ष उमेदवारी अर्ज दाखल केला आहे. यावेळी त्यांनी माध्यमांना प्रतिक्रिया दिली आहे. मा‍झ्या हातात सातारा द्या, साताऱ्याचा ‘सितारा‘ करून दाखवतो असं यावेळी ते म्हणाले.

राज्यात 246 नगरपरिषदांची निवडणूक होणार आहे. नगर परिषदेसाठी 2 डिसेंबर रोजी मतदान होणार आहे. तसेच 3 डिसेंबर रोजी निकाल लागणार आहेत. निवडणूक आयोगाने याबाबतची घोषणा करताच नगरपरिषदांमध्ये आचारसंहिता लागू झाली आहे. अनेक उमेदवार निवडणुकीसाठी उमेदवारीचा अर्ज भरताना दिसत आहेत. दरम्यान, कवी मनाचे नेते, बिग बॉस फेम अभिजीत बिचुकले पुन्हा निवडणुकीच्या रिंगणात उतरल्याचे समोर आले आहे. आता अभिजीत बिचुकले कुठून निवडणूक लढणार? असा प्रश्न अनेकांना पडला आहे.

हेही वाचा – अभिनेत्री निवेदिता सराफ भाजपचं समर्थन करत बेधडक बोलल्या; विरोधकांनी त्यांची लाचारीच काढली..

अर्ज भरल्यानंतर दिली पहिली प्रतिक्रिया

“साताऱ्यामध्ये मागील 25 वर्षापासून रस्त्यांवरील खड्डे, रस्त्यांची झालेली चाळण, बागांची दुरावस्था मी पाहतोय. डॉक्टर बाबासाहेब आंबेडकर हे शिकलेल्या प्रतापसिंह हायस्कूलचे राष्ट्रीय स्मारक बनवायचंय बरोबरच साताऱ्याला सितारा बनवणार असल्याने सातारकरांनी मला नगराध्यक्ष बनवा,“ असं आवाहन बिचुकले यांनी यावेळी सातारकरांना केलं आहे.

सातारा नगरपालिकेतील सर्वांची अंडी-पिल्ली बाहेर काढणार

पुढे ते म्हणाले की, नगरपालिका ही माझी मातृसंस्था आहे. मी माझी सौभ्यावती अलंकृता बिचुकले यांचा प्रचार करत होतो. म्हणून काही लोकांनी त्यांच्या स्वार्थासाठी हारामगिरी करुन मला नोकरीवरुन काढलं. एवढा मोठा अन्याय माझ्यावर झाला. सातारा नगरपालिकेतील सगळी अंडी-पिल्ली बाहेर काढायची आहेत. अभिजित बिचुकले यांनी नगराध्यक्षपदासाठी उमेदवारीचा अर्ज दाखल करत भाजपचे खासदार उदयनराजे भोसले आणि मंत्री शिवेंद्रराजे भोसले यांच्या विरोधात शड्डू ठोकला आहे.

नगरपालिका आणि नगर पंचायत निवडणुकीसाठी उमेदवारी अर्ज दाखल करण्यास सुरुवात झाली आहे. नगरपालिका निवडणुकीत नगराध्यक्ष पदासाठी अनेक जण इच्छुक आहेत. अनेकांनी उमेदवारीचा अर्ज भरला आहे. 17 नोव्हेंबर 2025 ही अर्ज करण्याची अंतिम तारीख आहे. त्यापूर्वी साताऱ्याचे कवी मनाचे नेते, बिग बॉस फेम अभिजीत बिचुकले यांनी देखील प्रथमच सातारच्या नगराध्यक्ष पदासाठी आपला अपक्ष उमेदवारी अर्ज दाखल केला आहे. त्यानंतर त्यांनी चौफेर टीका करत, सातारकरांना मतदान करण्याचे आवाहन केलं आहे.

निवडणुकीचा कार्यक्रम कसा असणार?

राज्यातील 246 नगर परिषदा आणि 42 नगर पंचायतीच्या निवडणुका होणार आहेत. येत्या 2 डिसेंबरला मतदान होणार आहे, तर 3 डिसेंबरला निकाल लागणार आहे. 17 नोव्हेंबर रोजी उमेदवारी अर्ज भरण्याची शेवटची तारीख आहे. 21 नोव्हेंबर रोजी उमेदवारी अर्ज मागे घेण्याची शेवटची तारीख आहे. त्यानंतर 25 नोव्हेंबर रोजी निवडणूक लढवणाऱ्या उमेदवारांच्या नावाची अंतिम यादी जाहीर करण्यात येणार आहे.