Typhoon Kalmaegi Philippines : कालमेगी वादळानं फिलीपिन्समध्ये कहर केला आहे. आतापर्यंत, विनाशकारी वादळ आणि पुरात 114 जणांचा मृत्यू झाला आहे आणि शेकडो जण बेपत्ता आहेत. हजारो घरं, वाहनं आणि पूल वाहून गेले आहेत. सरकारी संस्थांनी याला अभूतपूर्व आपत्ती असं वर्णन केलं आहे. अध्यक्ष फर्डिनांड मार्कोस ज्युनियर यांनी गुरुवारी आणीबाणीची स्थिती जाहीर केली. फिलीपिन्सच्या सेबू प्रांतात पुराचं पाणी इतकं जोरदार होतं की कार, झोपड्या आणि मोठे शिपिंग कंटेनर देखील वाहून गेले. सेबू शहराजवळील लिलोआन शहरात पस्तीस मृतदेह सापडले आहेत. रस्ते अजूनही चिखलानं आणि ढिगाऱ्यानं माखलेले आहेत आणि घरांचे छप्पर उडून गेले आहेत.

प्रत्यक्षदर्शींनी काय सांगितलं :

क्रिस्टीन एटन या स्थानिक महिलेनं सांगितलं की तिची अपंग बहीण मिशेल पाण्यात अडकली होती. “आम्ही चाकू आणि रॉडनं दरवाजा उघडण्याचा प्रयत्न केला पण तो अयशस्वी झाला,” ती म्हणाली. पाणी इतकं वर आलं की रेफ्रिजरेटरही तरंगू लागला. बाबा म्हणाले, “जर आपण प्रयत्न केला तर आपण तिघंही बुडू.” शेजारच्या निग्रोस बेटावरही परिस्थिती भयानक होती. तिथे किमान 30 जणांना आपला जीव गमवावा लागला. पोलीस अधिकारी स्टीफन पोलिनार यांच्या मते, पावसानं ज्वालामुखीची राख आणि चिखल खालच्या गावांमध्ये वाहून नेला, ज्यामुळं घरे पूर्णपणे गाडली गेली.

बचाव हेलिकॉप्टरलाही अपघात (Typhoon Kalmaegi Philippines)

सरकारी अहवालांनुसार, मृतांमध्ये सहा लष्करी कर्मचाऱ्यांचा समावेश आहे ज्यांचे हेलिकॉप्टर मदत मोहिमेदरम्यान कोसळलं. सेबूमध्ये पूर इतका तीव्र होता की स्थानिक दुकानदार रेनाल्डो व्हेर्गारा म्हणाले, “पहाटे 4 नंतर पाणी इतके जोरदार होते की बाहेर पडणे अशक्य होते. सर्व काही वाहून गेले. हे यापूर्वी कधीही घडले नव्हते.” वादळाच्या मार्गावरून सुमारे 800000 लोकांना बाहेर काढण्यात आले आहे. हवामानशास्त्रज्ञ चारमेन वरिला यांच्या मते, सेबू प्रदेशात फक्त 24 तासांत 18 सेंटीमीटरपेक्षा जास्त पाऊस पडला, जो सरासरी मासिक पावसापेक्षा जास्त आहे. त्यांनी तो आतापर्यंतचा सर्वात जास्त पाऊस असल्याचे वर्णन केले.

टायफून कलमेगी आता व्हिएतनामजवळ येत आहे. गुरुवारी सकाळपर्यंत, वारे ताशी 155 किलोमीटर वेगाने वाहत होते, तर वाऱ्यांचा वेग ताशी 190 किलोमीटरपर्यंत पोहोचला होता. हवामान खात्याने इशारा दिला आहे की आठ मीटर उंचीच्या लाटा उसळण्याची शक्यता आहे. व्हिएतनामी सरकारनं सर्व किनारी भागांसाठी अलर्ट जारी केला आहे आणि त्याला “अत्यंत धोकादायक” वादळ म्हटले आहे.