GG Beat DC : WPL 2026 मध्ये, गुजरात जायंट्सनं एका रोमांचक सामन्यात दिल्ली कॅपिटल्सचा चार धावांनी पराभव केला. चालू स्पर्धेत दिल्लीचा हा सलग दुसरा पराभव आहे. प्रथम फलंदाजी करताना गुजरातनं 209 धावा केल्या. त्यानंतर दिल्ली कॅपिटल्स फक्त 205 धावा करू शकला. शेवटच्या षटकात दिल्लीला जिंकण्यासाठी फक्त 7 धावा हव्या होत्या, पण त्यांना फक्त दोन धावा करता आल्या.

दिल्ली कॅपिटल्सकडून दोन फलंदाजांची अर्धशतकं :

दिल्ली कॅपिटल्सकडून लिझेल ली आणि लॉरा वोल्वार्डनं शानदार फलंदाजी केली. लिझेलनं 54 चेंडूत 12 चौकार आणि तीन षटकारांसह 86 धावा केल्या. लॉरानं 77 धावा केल्या. या दोन खेळाडूंव्यतिरिक्त इतर कोणत्याही फलंदाजानं चांगली कामगिरी केली नाही. शेवटच्या षटकात दिल्ली कॅपिटल्सला विजयासाठी फक्त ७ धावांची आवश्यकता होती.

शेवटच्या षटकात दिल्ली कॅपिटल्सला 7 धावा करता आल्या नाही :

गुजरात जायंट्सकडून सोफी डेव्हाईननं शेवटचा षटक टाकला आणि लॉरा वोल्वार्डनं पहिल्या चेंडूवर एक धाव घेतली. दुसऱ्या चेंडूवर दिल्लीची कर्णधार जेमिमा रॉड्रिग्ज बाद झाली. तिसऱ्या चेंडूवर मॅरिझाने कॅप धावू शकली नाही. त्यानंतर तिनं चौथ्या चेंडूवर एक धाव घेतली. पाचव्या चेंडूवर चांगली फलंदाजी करणाऱ्या लॉराला डेव्हाईननं बाद केलं. शेवटच्या चेंडूवर एकही धाव झाली नाही. परिणामी, दिल्लीनं षटकात फक्त दोन धावा काढल्या आणि सामना चार धावांनी गमावला.

सोफी डेव्हाईननं केल्या 95 धावा :

गुजरात जायंट्सनं प्रथम फलंदाजी करताना 209 धावा केल्या. सलामीवीर बेथ मुनी 19 धावांवर बाद झाली. मात्र सोफी डेव्हाईन आणि अ‍ॅशले गार्डनरनं जोरदार फलंदाजी केली आणि संपूर्ण मैदानावर स्ट्रोक खेळले. सोफीनं 42 चेंडूत सात चौकार आणि आठ षटकारांसह 95 धावा केल्या. त्यानंतर गार्डनरनं 26 चेंडूत चार चौकार आणि तीन षटकारांसह 49 धावा केल्या. दिल्ली कॅपिटल्सकडून नंदिनी शर्मानं सामन्यात शानदार गोलंदाजी केली आणि हॅटट्रिकसह पाच विकेट घेतल्या. तिनं 20 व्या षटकात हॅटट्रिकही घेतली.