MI Beat DC : WPL 2026 च्या त्यांच्या दुसऱ्या सामन्यात, मुंबई इंडियन्सनं दिल्ली कॅपिटल्सचा 50 धावांनी पराभव केला. मुंबईची कर्णधार हरमनप्रीत कौरनं शानदार कामगिरी केली आणि संघाच्या विजयात महत्त्वाची भूमिका बजावली. प्रथम फलंदाजी करताना मुंबईनं 195 धावा केल्या, परंतु दिल्ली कॅपिटल्स नंतर 145 धावांवर गारद झाली.
हरमनप्रीत कौरनं झळकावलं अर्धशतक :
सलामीवीर अमेलिया केर धाव न घेता बाद झाल्यानं मुंबई इंडियन्सची सुरुवात खराब झाली. जी कमलिनी देखील मोठी धावसंख्या उभारु शकली नाही, ती 16 धावांवर बाद झाली. त्यानंतर नॅट सेव्हियर ब्रंट आणि हरमनप्रीत कौर यांनी दमदार अर्धशतकं झळकावली. या दोन्ही खेळाडूंनी मिळून संघाला मोठी धावसंख्या उभारण्यास मदत केली. ब्रंटनं 46 चेंडूत एकूण 70 धावा काढल्या, ज्यामध्ये 13 चौकारांचा समावेश होता. हरमनप्रीतनं 42 चेंडूत एकूण 74 धावा काढल्या, ज्यामध्ये आठ चौकार आणि तीन षटकारांचा समावेश होता. मुंबईनं निर्धारित 20 षटकांत एकूण 195 धावा केल्या. दिल्ली कॅपिटल्सच्या गोलंदाजांनी हरमनप्रीत आणि सेव्हिअर ब्रंटविरुद्ध चांगली कामगिरी केली नाही, ज्यामुळं ते पूर्णपणे अपयशी ठरले. नंदिनी शर्मानं सर्वाधिक दोन बळी घेतले.
चिनेल हेन्रीचा डाव अपयशी :
दिल्ली कॅपिटल्ससाठी चिनेल हेन्रीनं 56 धावा केल्या, परंतु ती संघाला विजयाकडे नेऊ शकली नाही. तिच्याशिवाय इतर कोणताही फलंदाज सातत्यपूर्ण फलंदाजी करु शकली नाही. कर्णधार जेमिमा रॉड्रिग्ज फक्त एक धाव घेत बाद झाली. फलंदाजांच्या खराब कामगिरीमुळे दिल्लीला पूर्ण 20 षटकंही पूर्ण करता आली नाहीत आणि ती 145 धावांवर ऑलआउट झाली.
निकोला केरी आणि अमेलिया केरचे प्रत्येकी तीन बळी :
निकोला केरी आणि अमेलिया केरनं मुंबई इंडियन्सकडून शानदार गोलंदाजी केली. दोन्ही गोलंदाजांनी प्रत्येकी तीन बळी घेतले. नॅट सेव्हियर ब्रंटनेही दोन बळी घेतले, तर शबनम इस्माइलने एक बळी घेतला.
