Iran attacks impact on oil and gas : महायुद्धाचा भडका हा काही केल्या शांत व्हायचं नाव घेत नाहीये, कारण इराणचा अमेरिकेसह ७ देशांवर भीषण प्रतिहल्ला पाहायला मिळालाय, अयातुल्ला खामेनी यांच्या मृत्यूनंतर आखातात आणखी तांडव पाहायला मिळतंय. आज पश्चिम आशिया एका भीषण युद्धाच्या खाईत लोटला गेला आहे. इराणचे सर्वोच्च नेते अयातुल्ला अली खामेनी यांची अमेरिकेने केलेल्या हवाई हल्ल्यात हत्या झाल्यानंतर, इराणने प्रचंड संतापातून ‘ऑपरेशन रिअ‍ॅलिटी’ अंतर्गत मध्य पूर्वेतील सात प्रमुख देशांमधील अमेरिकन लष्करी तळांवर आणि मोक्याच्या ठिकाणांवर एकाच वेळी क्षेपणास्त्रे आणि ड्रोनचा वर्षाव केला आहे. या हल्ल्यांमुळे संपूर्ण जगात खळबळ उडाली असून कच्च्या तेलाच्या किमतींनी उच्चांक गाठला आहे.

गेल्या काही दिवसांपासून इराण आणि अमेरिका यांच्यातील तणाव शिगेला पोहोचला होता. इराणने ओमानच्या आखातात अमेरिकन तेलवाहू जहाजे रोखल्याचा आरोप करत, अमेरिकेने इराणच्या गॅस सुविधांवर आणि लष्करी मुख्यालयांवर जोरदार बॉम्बफेक केली. या हल्ल्यात इराणचे आध्यात्मिक आणि राजकीय प्रमुख अयातुल्ला अली खामेनी यांच्यासह अनेक वरिष्ठ लष्करी कमांडर मारले गेले. या घटनेने इराणमध्ये जनक्षोभ उसळला असून, इराणच्या रिव्होल्युशनरी गार्ड्सने “अमेरिकेला पृथ्वीवरून पुसून टाकण्याची” शपथ घेतली आहे.

इराणने ‘मल्टि-डायरेक्शनल’ हल्ले सुरू

खामेनी यांच्या मृत्यूनंतर अवघ्या काही तासांतच इराणने ‘मल्टि-डायरेक्शनल’ हल्ले सुरू केले. इराणने केवळ इस्रायललाच नव्हे, तर ज्या देशांमध्ये अमेरिकेचे लष्करी तळ आहेत, त्या सातही देशांना लक्ष्य केले. कतारमधील अल्-उदेद या अमेरिकेच्या सर्वात मोठ्या हवाई तळावर इराणने ‘फतेह’ बॅलिस्टिक क्षेपणास्त्रे डागली. प्राथमिक माहितीनुसार, येथे १६ सैनिक जखमी झाले असून तळाचे मोठे नुकसान झाले आहे. कुवेतच्या सीमेजवळील अमेरिकन लष्करी छावण्यांवर इराणने आत्मघाती ड्रोनद्वारे हल्ले केले. कुवेत सरकारने देशात आणीबाणी जाहीर केली आहे. इराकमधील अमेरिकन दूतावास आणि बाबिल प्रांतातील लष्करी तळांवर डझनावारी रॉकेट डागण्यात आले. यात २ जणांचा मृत्यू झाला असून ३ जण गंभीर जखमी आहेत. बहरीनमध्ये अमेरिकेचे ‘पाचवे आरमार’ तैनात आहे. इराणने बहरीन आंतरराष्ट्रीय विमानतळ आणि मनामा येथील एका बहुमजली इमारतीवर ड्रोन हल्ला केला, ज्यामुळे विमानतळावरील कामकाज ठप्प झाले आहे.

तेल शुद्धीकरण प्रकल्पांच्या दिशेने इराणने क्षेपणास्त्रे डागली

ओमानच्या खासाब बंदराजवळ एका जहाजाला इराणच्या नौदलाने लक्ष्य केले. दुकम बंदरावरील हल्ल्यात ५ जण जखमी झाले आहेत. सौदी अरेबिया आणि यूएई या दोन्ही देशांमधील तेल शुद्धीकरण प्रकल्पांच्या दिशेने इराणने क्षेपणास्त्रे डागली होती. मात्र, सौदीच्या ‘पॅट्रियट’ क्षेपणास्त्र संरक्षण यंत्रणेने अनेक ड्रोन हवेतच पाडल्याचा दावा केला आहे. दुबई आणि अबू धाबीमध्येही हाय अलर्ट जारी करण्यात आला आहे. इराणचा सर्वात मोठा शत्रू असलेल्या इस्रायलच्या दिशेने ‘खैबर-शेकान’ ही लांब पल्ल्याची क्षेपणास्त्रे डागण्यात आली. तेल अवीवमध्ये सायरेनचा आवाज घुमत असून नागरिक बंकर्समध्ये आश्रय घेत आहेत.

तेलाच्या किमती प्रति बॅरल १५० डॉलरच्या पार

या युद्धामुळे जागतिक बाजारपेठेत भूकंप झाला आहे. ब्रेंट क्रूड तेलाच्या किमती प्रति बॅरल १५० डॉलरच्या पार गेल्या आहेत. होर्मुझची सामुद्रधुनी इराणने बंद करण्याची धमकी दिल्याने जागतिक तेल पुरवठा धोक्यात आला आहे. भारत, अमेरिका आणि युरोपीय देशांच्या शेअर बाजारात मोठी घसरण पाहायला मिळत आहे. गुंतवणूकदारांनी सोन्यामध्ये गुंतवणूक वाढवल्याने सोन्याचे भाव गगनाला भिडले आहेत.

भारतीयांना बाहेर काढण्यासाठी ‘ऑपरेशन गंगा’

भारत या संघर्षावर बारकाईने लक्ष ठेवून आहे. आखाती देशांमध्ये लाखो भारतीय काम करतात. कतार, कुवेत आणि यूएई मधील भारतीयांच्या सुरक्षेबाबत परराष्ट्र मंत्रालयाने (चिंता व्यक्त केली आहे. हेलिॉप्टर आणि जहाजांद्वारे भारतीयांना बाहेर काढण्यासाठी ‘ऑपरेशन गंगा’ सारखी मोहीम राबवण्याची शक्यता आहे. भारताची ८०% तेलाची गरज आयातीवर अवलंबून आहे. जर हे युद्ध दीर्घकाळ चालले, तर भारतात पेट्रोल-डिझेलचे दर प्रचंड वाढून महागाईचा भडका उडू शकतो.

रशिया आणि चीनने अमेरिकेच्या कारवाईचा निषेध

संयुक्त राष्ट्रसंघाने तातडीची बैठक बोलावली आहे. रशिया आणि चीनने अमेरिकेच्या कारवाईचा निषेध केला असून, अमेरिकेने पश्चिम आशियात तिसरे महायुद्ध भडकवले आहे, अशी टीका केली आहे. दुसरीकडे, ब्रिटन आणि फ्रान्सने अमेरिकेच्या संरक्षणात्मक कारवाईचे समर्थन केले आहे. आजचा दिवस इतिहासातील अत्यंत काळा दिवस ठरला आहे. इराणने केलेल्या या सात देशांवरील हल्ल्यांमुळे आखाती देशांमधील अनेक ठिकाणं सध्या जळत आहेत.

युद्धात थांबायचं कधी हे अमेरिकेलाही माहिती नाही

अमेरिकेनं हे युद्ध पेटवलं खरं, मात्र या युद्धात थांबायचं कधी हे अमेरिकेलाही माहिती नाही, ट्रम्प हे इतर देशांकडे आता मदतीच्या याचना करून लागल्या आहेत, मात्र सध्या कोणताही नवा देश अमेरिकेच्या मदतीला धावून जाताना दिसत नाही, प्रत्येक देश तेलासाठी आपले रिलेशन इराणशी कसे पडद्यामागून जपता येतील, याबाबत सध्या प्रयत्नशील आहे, त्यामुळे सध्या तरी तेलाच्या दराची चिंत प्रत्येकाला सतावतेय, भारतात आत्ताच गॅस आणि पेट्रोलसाठी रांगा लागतायत, अनेक हॉटेल्स बंद झाली आहेत, तर दुसरीकडे सरकारकडून कसंबसं परिस्थिती नियंत्रणात आणण्याचे प्रयत्न सुरू आहेत, मात्र सर्व काही अवलंबून आहे ते युद्ध कधी थांबतयत यावर…इराणचं आजचं रौद्ररुप पाहता हे युद्ध इतक्यात थांबण्याची शक्यता धुसर झालीय, त्यामुळे तेल आणि पेट्रोलसाठी जास्त पैसे मोजण्यासाठी तयार राहवं लागणार आहे, अशी चर्चा सध्या सुरूय…