मुंबई CSK Beat MI : इंडियन प्रीमियर लीगच्या 19व्या हंगामातील 33वा साखळी सामना मुंबई इंडियन्स आणि चेन्नई सुपर किंग्स यांच्यात मुंबई इंडियन्सच्या घरच्या मैदानावर, वानखेडे स्टेडियमवर खेळला गेला. सीएसकेनं हा सामना 103 धावांनी जिंकला. यासह मुंबईचा हा हंगामातील पाचवा पराभव ठरला आहे.

हेही वाचा : ऑनलाइन गेमिंगबाबत सरकारचा मोठा निर्णय; 1 मे पासून लागू होणार

सॅमसनचं दमदार शतक :

मुंबई इंडियन्सचा कर्णधार हार्दिक पांड्यानं नाणेफेक जिंकून प्रथम गोलंदाजी करण्याचा निर्णय घेतला. यानंतर प्रथम फलंदाजी करताना सीएसकेनं 20 षटकांत 207 धावा केल्या. चेन्नई सुपर किंग्सकडून संजू सॅमसनची फलंदाजी प्रभावी ठरली, त्यानं 54 चेंडूंमध्ये 10 चौकार आणि 6 षटकारांसह नाबाद 101 धावा केल्या. गायकवाडनंही 22 आणि ब्रेविसनं 21 धावा केल्या. मुंबई इंडियन्सकडून गझनफर आणि अश्विन कुमार यांनी प्रत्येकी दोन बळी घेतले, तर बुमराह आणि सँटनर यांनी प्रत्येकी एक बळी घेतला.

मुंबईची फलंदाजी अपयशी :

लक्ष्याचा पाठलाग करताना, मुंबई इंडियन्सची सुरुवात खराब झाली आणि त्यांनी अवघ्या 11 धावांत आपले पहिले तीन गडी गमावले. त्यानंतर तिलक वर्मा आणि सूर्यकुमार यादव यांनी चौथ्या विकेटसाठी 73 धावांची भागीदारी करून डाव सावरण्याचा प्रयत्न केला. तिलक वर्मा 37 धावांवर बाद झाल्यानंतर, मुंबई इंडियन्सच्या विकेट्स झपाट्यानं पडल्या, ज्यात सूर्याच्या 36 धावांवरील विकेटचाही समावेश होता. मुंबई इंडियन्सचा डाव 19 षटकांत 104 धावांवर संपला, जो आयपीएलच्या इतिहासातील त्यांचा सर्वात मोठा पराभव ठरला. चेन्नई सुपर किंग्सच्या गोलंदाजीवर अकील होसेनचे वर्चस्व होते, ज्यानं चार बळी घेतले, तर नूर अहमदने दोन बळी घेतले. मुकेश चौधरी, अंशुल कंबोज, जेमी ओव्हरटन आणि गुर्जपनीत सिंग यांनी प्रत्येकी एक बळी घेतला.