PBKS Playoff Equation: आज (14 मे) आयपीएल 2026 मधील 58वा सामना पंजाब किंग्स आणि मुंबई इंडियन्स यांच्यात धर्मशाला येथे खेळवला जाणार आहे. मुंबई इंडियन्स आधीच प्लेऑफच्या शर्यतीतून बाहेर पडली आहे. मात्र पंजाब किंग्ससाठी हा सामना प्लेऑफच्या दृष्टीने अत्यंत महत्त्वाचा असणार आहे. जर श्रेयस अय्यरच्या नेतृत्वाखालील पंजाब किंग्स आजचा सामना गमावला, तर संघ प्लेऑफच्या शर्यतीतून बाहेर पडेल का? जाणून घेऊया पंजाबचे प्लेऑफ समीकरण.

आज मुंबईविरुद्ध हरल्यास पंजाब प्लेऑफमधून बाहेर पडणार?

पंजाब किंग्सचा हा हंगामातील 12वा सामना असेल. संघाने आतापर्यंत 11 सामने खेळले असून त्यापैकी 6 सामने जिंकले आहेत, तर 4 सामन्यांत पराभव स्वीकारावा लागला आहे. एक सामना पावसामुळे रद्द झाला होता. या कामगिरीसह पंजाबकडे 13 गुण आणि +0.428 नेट रनरेट आहे. संघ सध्या गुणतालिकेत चौथ्या स्थानावर आहे.जर आज मुंबई इंडियन्सविरुद्ध पंजाबचा पराभव झाला, तर 12 सामन्यांनंतर संघाकडे 13 गुणच राहतील. अशा परिस्थितीत प्लेऑफमध्ये पोहोचण्यासाठी पंजाबला उर्वरित दोन्ही सामने जिंकून 17 गुणांपर्यंत पोहोचणे आवश्यक असेल.सध्या रॉयल चॅलेंजर्स बंगळुरू आणि गुजरात टायटन्स या दोन्ही संघांनी 16-16 गुण मिळवले आहेत. हे संघ अनुक्रमे गुणतालिकेत पहिल्या आणि दुसऱ्या स्थानावर आहेत.दुसरीकडे, जर पंजाबने आज मुंबईविरुद्ध विजय मिळवला, तर प्लेऑफमध्ये पोहोचण्याचा मार्ग अधिक सोपा होईल. विजयासह पंजाबकडे 15 गुण होतील आणि संघ गुणतालिकेत तिसऱ्या स्थानावर पोहोचू शकतो.

पाऊस पडून सामना रद्द झाला तर?

जर पावसामुळे सामना रद्द झाला, तर पंजाबला त्याचा फायदा होईल. सामना रद्द झाल्यास दोन्ही संघांना प्रत्येकी 1 गुण दिला जाईल. त्यामुळे पंजाबकडे 12 सामन्यांनंतर 14 गुण होतील. त्यानंतर उर्वरित दोन्ही सामने जिंकून पंजाब 18 गुणांसह प्लेऑफमध्ये आपले स्थान निश्चित करू शकते.आता आजच्या सामन्यात पंजाब किंग्स कशी कामगिरी करते, याकडे सर्व क्रिकेट चाहत्यांचे लक्ष लागले आहे.